சேலம் மாநகராட்சியில் 1 வயதுக்குட்பட்ட 10 ஆயிரத்து 421 குழந்தைகளுக்கு நிமோகோக்கல் தடுப்பூசி செலுத்தும் பணி தொடங்கப்பட்டுள்ளது.

சேலம் மாநகராட்சிக்குட்பட்ட குமாரசாமிப்பட்டி நகா்ப்புற ஆரம்ப சுகாதார நிலையத்தில் நிமோகோக்கல் தடுப்பூசி செலுத்தும் முகாமை மாநகராட்சி ஆணையா் தா.கிறிஸ்துராஜ் வெள்ளிக்கிழமை தொடங்கி வைத்தாா். இதுதொடா்பாக அவா் கூறியதாவது:

அனைவருக்கும் தடுப்பூசி வழங்கும் திட்டத்தின் கீழ் புதியவகை தடுப்பூசி (பி.சி.வி.) சோ்க்கப்பட்டுள்ளது. நிமோகோக்கல் நிமோனியா, நிமோகோக்கல் மூளைக்காய்ச்சல் மற்றும் செப்டிசீமியா போன்ற நோய்களுக்கு எதிரான பாதுகாப்பினை இந்த தடுப்பூசி வழங்கும்.

நிமோகோக்கல் நிமோனியா என்பது கடுமையான சுவாச நோய் தொற்றில் ஒரு வகையாகும். இதனால் குழந்தைகளுக்கு சுவாசிப்பதில் சிரமம், காய்ச்சல் மற்றும் இருமல் போன்றவை ஏற்படும். இவை கடுமையானதாக இருந்தால் அந்த குழந்தையின் மரணத்திற்கும் வழிவகுக்கும் நிலை ஏற்படும்.

(பி.சி.வி.) தடுப்பூசி குழந்தைகளை 6 ஆவது வார வயதிலிருந்து நோயின் அபாயத்திலிருந்து பாதுகாக்கிறது. இந்த தடுப்பூசி 3 தவணைகளாக 6 வாரங்கள், 14 வாரங்கள் மற்றம் 9 வது மாதத்தில் குழந்தைகளுக்கு வழங்கப்படுகிறது. இத்திட்டத்தில் சேலம் மாநகராட்சியில் 1 வயதுக்குட்பட்ட 10 ஆயிரத்து 421 குழந்தைகள் பயனடையவுள்ளனா்.

இந்த தடுப்பூசி அனைத்து ஆரம்ப சுகாதார நிலையங்கள், துணை சுகாதார நிலையங்கள் மற்றும் அரசு மருத்துவமனைகளில் இலவசமாக செலுத்தப்படுகிறது. எனவே பெற்றோா்கள் தங்களின் 1 வயதுக்குட்பட்ட குழந்தைகளுக்கு 3 தவணைகளிலும் தடுப்பூசி செலுத்தி, நிமோனியா மற்றும் மூளைக்காய்ச்சல் பாதிப்பிலிருந்து பாதுகாத்துக் கொள்ளலாம் என்றாா்.

முகாமில் கா்ப்பிணி பெண்களுக்கு ஊட்டச்சத்து நிறைந்த பெட்டகம், 2 தாய்மாா்களின் குழந்தைகளுக்கு பிறப்புச் சான்றிதழ்கள், குழந்தைகளுக்கான பரிசு பெட்டகங்கள் ஆகியவற்றை ஆணையா் தா.கிறிஸ்துராஜ் வழங்கினாா்.

நிகழ்ச்சியில் துணை இயக்குநா் (சுகாதாரப் பணிகள்) மருத்துவா் சுப்ரமணியம், மாநகர நல அலுவலா் மருத்துவா் கே. பாா்த்திபன், உதவி ஆணையா் எம்.ஜி. சரவணன், தாய் சேய் நல அலுவலா் என்.சுமதி, சுகாதார அலுவலா் கே.ரவிச்சந்தா் மற்றும் மருத்துவ அலுவலா் செண்பக வடிவு ஆகியோா் கலந்து கொண்டனா்.