சேலம் மாநகராட்சி சுகாதாரப் பணியாளா்களுக்கு கரோனா தடுப்பூசி செலுத்தும் பணியை ஆணையா் ந.ரவிச்சந்திரன் திங்கள்கிழமை நேரில் பாா்வையிட்டாா்.

சேலம் மாநகராட்சி சுகாதாரப் பணியாளா்கள், தனியாா் மருத்துவமனை பணியாளா்களுக்கு கரோனா தடுப்பூசி செலுத்தும் சிறப்பு முகாம் குமாரசாமிப்பட்டி நகா்ப்புற ஆரம்ப சுகாதார நிலையம், தாதகாப்பட்டி நகா்ப்புற ஆரம்ப சுகாதார மையங்களில் நடைபெற்றது. இதில், மாநகர நல அலுவலா் மருத்துவா் கே.பாா்த்தீபன், தாய்-சேய் நல அலுவலா் என்.சுமதி உள்பட 206 மாநகராட்சி சுகாதாரப் பணியாளா்கள், தனியாா் மருத்துவமனைகளைச் சோ்ந்த 25 மருத்துவப் பணியாளா்கள் என மொத்தம் 231 போ் தடுப்பூசி போட்டுக் கொண்டனா்.

சேலம், குமாரசாமிப்பட்டி நகா்ப்புற ஆரம்ப சுகாதார நிலையத்தில் நடைபெற்ற மாநகர சுகாதாரப் பணியாளா்களுக்கான சிறப்பு தடுப்பூசி முகாமினை மாநகராட்சி ஆணையா் ந.ரவிச்சந்திரன் நேரில் பாா்வையிட்டு ஆய்வு செய்தாா். மேலும், முகாமில் மேற்கொள்ளப்பட்ட கணினியில் பதிவு செய்யும் வசதி, காத்திருப்போா் அறை, கண்காணிப்பு அறை என 3 அறைகளில் மேற்கொள்ளப்பட்டுள்ள வசதிகளையும் அவா் ஆய்வு செய்தாா்.