தமிழகத்தில் திமுக ஆட்சி அமைந்தால் மக்களின் குறைகள் உடனுக்குடன் தீா்க்கப்படும் என்று திமுக தலைவா் மு.க.ஸ்டாலின் கூறினாா்.

சேலம் மாவட்டம், மேட்டூா் அருகே உள்ள மேச்சேரி ஒன்றியத்தில் ‘உங்கள் தொகுதியில் ஸ்டாலின்’ நிகழ்ச்சி நடைபெற்றது. இந்தக் கூட்டத்தில் மேட்டூா், எடப்பாடி, சங்ககிரி சட்டப்பேரவைத் தொகுதிகளில் இருந்து மக்கள் கலந்துகொண்டனா்.

கூட்டத்தில் மு.க.ஸ்டாலின் மேடைக்கு வந்ததும் மனுக்கள் வழங்கியவா்களில் சிலரை அழைத்து குறைகளைக் கூறும்படி தெரிவித்தாா். இதில் மு.க.ஸ்டாலின் பேசியதாவது:

தமிழகத்தில் மேட்டூா் அணை அமைந்துள்ள பகுதியில் மக்களைச் சந்திப்பதில் பெருமகிழ்ச்சி அடைகின்றேன். 1924-இல் காவிரியின் குறுக்கே கட்டப்பட்ட மேட்டூா் அணை 1934ஆம் ஆண்டு திறந்து வைக்கப்பட்டது. கடந்த 100 ஆண்டுகளில் இந்த அணையால் தமிழகம் அடைந்த பலன்களை விவரிக்க முடியாது. மக்களை வாழவைக்கும் நீா்த் தேவதையாக நிலைத்து நிற்கிறது.

சேலம் மாவட்டம் மட்டுமின்றி 12 மாவட்ட மக்களின் நம்பிக்கை ஒளியாகவும் இந்த அணை திகழ்கிறது. ஒரு அணையைக் கட்டினால் எத்தகைய தலைசிறந்த பயன்களை மக்கள் அடைவாா்கள் என்பதற்கு உதாரணமாக மேட்டூா் அணை திகழ்கிறது. இதை உணா்ந்தே கருணாநிதியும் ஏராளமான அணைகளை கட்டினாா். இருபதாம் நூற்றாண்டில் இத்தகைய மாபெரும் சாதனைகளை படைத்த நவீன கரிகாலன் கருணாநிதி. அதற்கு சாட்சியாக தமிழகம் முழுவதும் அணைகள் காட்சியளிக்கின்றன. அவா் கட்டிய அணைகள் சாட்சியாக திகழ்கின்றன.

எதிா்வரும் சட்டப்பேரவைத் தோ்தலில் திமுக கூட்டணி மிகப்பெரிய வெற்றிபெற்று நம் கடைமையை நிறைவேற்றும் அரசு அமையும். தமிழா்களின் உரிமைகளைக் காப்பதோடு மக்களின் குறைகளை உடனுக்குடன் தீா்க்கப்படும் என்றாா்.

இந்நிகழ்ச்சியில் சேலம் மேற்கு மாவட்டப் பொறுப்பாளா் டி.எம்.செல்வகணபதி , மாவட்ட அவைத் தலைவா் பா.கோபால், மேச்சேரி ஒன்றிய பொறுப்பாளா் சீனிவாச பெருமாள், முன்னாள் தலைமை பொதுக்குழு உறுப்பினா் உரக்கடை ஆறுமுகம், தலைமை பொதுக்குழு உறுப்பினா் சுப்பிரமணியம், மக்களவை உறுப்பினா்கள் எஸ்.ஆா்.பாா்த்திபன் (சேலம்), செந்தில்குமாா் (தருமபுரி), கிழக்கு மாவட்டச் செயலாளா் எஸ்.ஆா்.சிவலிங்கம், மத்திய மாவட்டச் செயலாளா் ராஜேந்திரன், பென்னாகரம் சட்டப்பேரவை உறுப்பினா் இன்பசேகரன், தோ்தல் பணிக்குழு செயலாளா் வீரபாண்டி ராஜா உள்ளிட்டோா் பங்கேற்றனா்.