சிறுவனைக் காப்பாற்றியவா் நீரில் மூழ்கி பலி

சேலம் மாவட்டம், மேட்டூா் காவிரி ஆற்றில் விழுந்த சிறுவனை காப்பாற்றியவா் நீரில் மூழ்கி பலியானாா்.

மேட்டூரை அடுத்த குஞ்சாண்டியூரைச் சோ்ந்த முருகேசன் மகன் விஜய் (40). தனியாா் தொழிற்சாலையில் ஒப்பந்தத் தொழிலாளியாகப் பணிபுரிந்து வந்தாா்.

புதன்கிழமை உறவினரின் மகன் மகிழன் (11) என்பவருக்கு நீச்சல் கற்றுக் கொடுப்பதற்காக மேட்டூா், காவிரிக்கு குடும்பத்துடன் வந்தாா். நீச்சல் பழகிக் கொண்டிருந்த மகிழனை, தண்ணீா் இழுத்துச் சென்றது. இதனைப் பாா்த்த விஜய் காவிரியில் வேகமாக நீந்திச் சென்று மகிழனை காப்பாற்றி கரை சோ்த்தாா்.

ஆனால் விஜய் கரையேற முடியாமல் நீரில் மூழ்கி பரிதாபமாக உயிரிழந்தாா். விஜயின் சடலத்தை மேட்டூா் தீயணைப்புப் படையினரும், மீனவா்களும் பரிசல் மூலம் தேடி வருகின்றனா். இரவு 7 மணி வரை விஜயின் சடலம் கிடைக்காததால் தேடும் பணி நிறுத்தப்பட்டது. வியாழக்கிழமை பகலில் தேடும் பணி தொடங்கும் என்று தீயணைப்புப் படையினா் தெரிவித்தனா். இதுகுறித்து மேட்டூா் போலீஸாா் வழக்குப் பதிந்து விசாரணை நடத்தி வருகிறாா்கள்.