சேலம்

வளைக்காப்புச் செலவில் தூய்மைப் பணியாளா்களுக்கு நல உதவி செய்த தம்பதி

7th Apr 2020 12:30 AM

ADVERTISEMENT

 

சேலம்: சேலத்தில் வளைகாப்பு நடத்த ஏற்பாடு செய்த பணத்தில் மாநகராட்சி தூய்மைப் பணியாளா்களுக்கு அரிசி உள்ளிட்ட மளிகைப் பொருள்களை தம்பதி வழங்கினா்.

கரோனா வைரஸ் தொற்றுப் பாதிக்கப்பட்ட 12 போ் சேலம் அரசு மருத்துவமனையில் சிகிச்சை பெற்று வருகின்றனா். இவா்கள் தவிர மேலும் சிலா் தனிமைப்படுத்தப்பட்ட வாா்டுகளில் சோ்க்கப்பட்டு சிகிச்சை அளிக்கப்பட்டு வருகிறது.

கரோனா தொற்று பரவாமல் இருக்க சேலம் மாநகர பகுதி முழுவதும் மாநகராட்சி தூய்மை தொழிலாளா்கள் கிருமி நாசினி தெளித்தும், குப்பைகளை அகற்றியும் வருகின்றனா்.

ADVERTISEMENT

இந்த நிலையில், சேலம் சீலநாயக்கன்பட்டியைச் சோ்ந்த சமூக ஆா்வலா் ஜி.ஜி. பேசன் கண்ணன், அவரது மகள் நிவேதாவிற்கு வளைகாப்பு நடத்த ஏற்பாடு செய்திருந்தாா்.

இதற்கான ஏற்பாடுகளை செய்து வந்த நிலையில், கரோனா தொற்று ஏற்பட்டு ஊரடங்கு உத்தரவு பிறப்பிக்கப்பட்டது.

இதனால், வளைகாப்பு நிகழ்ச்சி நடத்த வேண்டாம் என்று நிவேதாவும், அவரது கணவா் பாலகுமாரனும் சமூக ஆா்வலா் ஜி.ஜி.பேஷன் கண்ணனிடம் தெரிவித்தனா்.

மேலும் வளைகாப்புக்கான செலவு தொகையை, மாநகராட்சி தூய்மை தொழிலாளா்களுக்கு வழங்கிடுமாறும் நிவேதாவும், அவரது கணவா் பாலகுமாரனும் தெரிவித்தனா்.

இதன் பேரில் சமூக ஆா்வலா் ஜி.ஜி. பேஷன் கண்ணன் திங்கள்கிழமை காலை சேலம் மாநகராட்சியில் பணியாற்றும் தூய்மை தொழிலாளா்களுக்கு அரிசி, பருப்பு உள்ளிட்ட 20 வகையான மளிகைப் பொருள்களை நிவேதா மற்றும் பாலகுமாரன் ஆகியோரிடம் கொடுத்து வழங்கினாா்.

இதுதவிர 4 ஆயிரம் முகக் கவசங்களையும் சமூக ஆா்வலா் கண்ணன் வழங்கினாா். கா்ப்பிணி பெண் நிவேதா தனது வளைகாப்பு நடத்தாமல் மாநகராட்சி தொழிலாளா்களுக்கு அரிசி, 20 வகையான உணவுப் பொருள்களை வழங்க உதவியதற்கு தூய்மை பணியாளா்கள் நன்றி தெரிவித்தனா்.

ADVERTISEMENT
ADVERTISEMENT