சேலம்

பெரியாா் பல்கலை.யில் ஆன்லைன் வகுப்புகள் தொடக்கம்

7th Apr 2020 12:25 AM

ADVERTISEMENT

 

ஓமலூா்: பெரியாா் பல்கலைக்கழக மாணவ-மாணவியா் பயன்பெறும் வகையில் பேராசிரியா்கள் ஆன்-லைன் முறையில் பாடம் நடத்த தொடங்கியுள்ளதாக துணைவேந்தா் பொ.குழந்தைவேல் தெரிவித்தாா்.

பெரியாா் பல்கலைக்கழகத்துக்குள்பட்ட நான்கு மாவட்டங்களில் நூற்றுக்கும் மேற்பட்ட கலை அறிவியல் கல்லூரிகளில் இரண்டு லட்சத்திற்கும் மேற்பட்ட மாணவ-மாணவியா் கல்வி பயின்று வருகின்றனா்.

சேலத்தில் பெரியாா் பல்கலைக்கழக வளாகத்தில் 27 ஆராய்ச்சித்துறைகள் இயங்கி வருகின்றன. இதில் முதுநிலை, ஆய்வியல் நிறைஞா் (எம்.பில்), முனைவா் பட்ட ஆராய்ச்சி படிப்புகள் பயிற்றுவிக்கப்பட்டு வருகின்றன. இதில் 3 ஆயிரத்துக்கும் மேற்பட்டோா் கல்வி பயின்று வருகின்றனா். கரோனா பாதிப்பைத் தடுக்கும் வகையில், கடந்த மாா்ச் 16-ஆம் தேதி முதல் முதுநிலை மாணவ-மாணவியருக்கு விடுமுறை விடப்பட்டது. ஊரடங்கு உத்தரவின் காரணமாக, வீட்டில் உள்ள மாணவ-மாணவியா் பயன்பெறும் வகையில் ஆன்-லைன் வகுப்புகளை நடத்துமாறு பல்கலைக்கழக மானியக் குழு அறிவுறுத்தியிருந்தது. இதன்பேரில் பெரியாா் பல்கலைக்கழகம் சாா்பில் ஆன்-லைன் வகுப்புகள் திங்கள்கிழமை முதல் தொடங்கப்பட்டிருப்பதாக துணைவேந்தா் பொ. குழந்தைவேல் தெரிவித்தாா்.

ADVERTISEMENT

இதுகுறித்து மேலும் அவா் கூறியது.

பெரியாா் பல்கலைக்கழகத்தில் முதுநிலை முதலாம் ஆண்டு பயின்று வரும் மாணவ-மாணவியருக்கு ஆன்லைன் பாட வகுப்புகளை நடத்த உத்தரவிடப்பட்டுள்ளது. இதன்படி நுண்ணுயிரியல் துறைத் தலைவா் பேராசிரியா் ஆா்.பாலகுருநாதன் தலைமையில் பேராசிரியா் குழுவினா் ஆன்லைன் வகுப்புகளை தொடங்கியுள்ளனா். அந்தத் துறையில் முதுநிலை முதலாம் ஆண்டு மாணவா்கள் ஜூம் செயலியை பயன்படுத்தி இந்த ஆன்-லைன் வகுப்பில் பங்கேற்றனா். ஆன்-லைன் வகுப்புகளை ஒருங்கிணைப்பதற்காக மேலாண்மைத்துறை இணைப் பேராசிரியா் ஆா்.சுப்ரமணியபாரதி நியமிக்கப்பட்டுள்ளாா்.

அடுத்த ஒரிரு தினங்களில் மற்ற துறைகள் சாா்பிலும் ஆன்-லைன் வகுப்புகள் தொடங்கப்படும் என்று துணைவேந்தா் பொ. குழந்தைவேல் தெரிவித்தாா்.

ADVERTISEMENT
ADVERTISEMENT