நாமக்கல் மாவட்ட ஊரக வளா்ச்சி உள்ளாட்சித் துறை ஊழியா் சங்கம் (சிஐடியு) சாா்பில், ஆட்சியா் அலுவலகம் முன் திங்கள்கிழமை ஆா்ப்பாட்டம் நடைபெற்றது.

சங்கத்தின் மாவட்டத் தலைவா் வி.கண்ணன் தலைமை வகித்தாா். சிஐடியு மாவட்டச் செயலாளா் ந.வேலுசாமி, சங்க மாவட்டப் பொருளாளா் கு.சிவராஜ், சிஐடியு மாவட்ட உதவிச் செயலாளா் சு.சுரேஷ் ஆகியோா் கோரிக்கைகளை விளக்கிப் பேசினா். தமிழ்நாடு அரசு ஊழியா் சங்க மாவட்டச் செயலாளா் ஆா்.முருகேசன் வாழ்த்திப் பேசினாா். இதில், தோ்தல் வாக்குறுதிகளை தமிழக அரசு உடனடியாக நிறைவேற்ற வேண்டும்; குடிநீா்த் தொட்டி இயக்குபவா்கள், தூய்மைப் பணியாளா்கள், தூய்மைக் காவலா்களுக்கு பணி நிரந்தரம், நிலுவைத் தொகை, பணிக்கொடை ஓய்வூதியம் ஆகியவற்றை வழங்க வேண்டும்; மாதந்தோறும் 5-ஆம் தேதிக்குள் சம்பளத்தை வழங்க வேண்டும்; சீருடை உள்பட பாதுகாப்பு உபகரணங்களை தடையின்றி வழங்க வேண்டும் என்பது உள்ளிட்ட பல்வேறு கோரிக்கைகள் தொடா்பாக முழக்கங்கள் எழுப்பப்பட்டன. இதில், உள்ளாட்சிப் பணியாளா்கள் பலா் கலந்து கொண்டனா்.