கிராம ஊராட்சிமன்ற தலைவா்கள் தேவையற்ற செலவினங்களைத் தவிா்க்க வேண்டும் என்று நாமக்கல்லில் சனிக்கிழமை நடைபெற்ற 322 கிராம ஊராட்சி தலைவா்களுக்கான கலந்தாய்வுக் கூட்டத்தில் மாவட்ட ஆட்சியா் ஸ்ரேயா பி.சிங் அறிவுறுத்தினாா்.

நாமக்கல் மாவட்ட ஊரக வளா்ச்சி மற்றும் ஊராட்சித் துறை சாா்பில் அனைத்து ஊராட்சி மன்ற தலைவா்களுக்கான ஊராட்சி நிா்வாகம் மற்றும் திட்ட செயலாக்கம் தொடா்பான கலந்தாய்வுக் கூட்டம் மாவட்ட ஆட்சியா் ஸ்ரேயா பி.சிங் தலைமையில் சனிக்கிழமை நடைபெற்றது. இதில் அவா் பேசியதாவது:

ஊராட்சிமன்ற தலைவா்கள் தங்கள் ஊராட்சியில் உள்ள வீடுகள், குடிநீா் தொட்டிகள், குடிநீா் இணைப்புகள் உள்ளிட்ட விவரங்களை நன்கு அறிந்து வைத்திருக்க வேண்டும். மக்களுக்குத் தேவையான அடிப்படை வசதிகளை மேம்படுத்தி மற்ற ஊராட்சிகளுக்கு முன்னுதாரணமாக திகழ வேண்டும்.

பொதுமக்களிடம் நன்மதிப்பைப் பெற வேண்டும். சுத்தமான, சுகாதாரமான குடிநீா் தட்டுப்பாடின்றி கிடைப்பதை உறுதி செய்ய வேண்டும். நீதிமன்ற வழக்குகள் ஏதேனும் நிலுவையில் இருந்தால் அதன் முழு விவரங்களையும் அறிந்து வைத்திருக்க வேண்டும். தேவையில்லாத இடங்களில் தெருவிளக்கு, செயல்படாத ஆழ்துளைக் கிணறு ஆகியவற்றின் மின் இணைப்பை முற்றிலுமாக துண்டித்து தேவையற்ற செலவினங்களைக் குறைக்க வேண்டும்.

எந்தவொரு திட்டத்துக்காகவும் இடத்தைத் தோ்வு செய்யும்போது ஊராட்சிக்கு சொந்தமான இடமாக அல்லது வருவாய்த் துறைக்கு சொந்தமான இடமாக இருப்பதை உறுதி செய்ய வேண்டும். தனிநபா் இடமாக இருந்தால் முறையான அனுமதி பெற்று பணிகளைத் தொடங்க வேண்டும். நிலுவையில் இருக்கும் திட்டப் பணிகளை ஊராட்சி மன்ற தலைவா்கள் விரைந்து முடிக்க வேண்டும் என்றாா்.

கூட்டத்தில் கிராம ஊராட்சிமன்றத் தலைவா்கள் ஆற்ற வேண்டிய பணிகள், கடைப்பிடிக்க வேண்டிய நெறிமுறைகள், மத்திய மற்றும் மாநில அரசுத் திட்டங்கள், குடியரசு தினம் மற்றும் கிராம சபைக் கூட்டம் தொடா்பாக மேற்கொள்ள வேண்டிய முன்னேற்பாடு பணிகள் ஆகியவை குறித்தும் எடுத்துரைக்கப்பட்டன.

கூட்டத்தில் மாவட்ட ஊரக வளா்ச்சி முகமை திட்ட இயக்குநா் சிவக்குமாா், திட்ட இயக்குநா் (மகளிா் திட்டம்) மா.பிரியா, உதவி இயக்குநா் (ஊராட்சிகள்) கலையரசு உள்பட வட்டார வளா்ச்சி அலுவலா்கள், ஊராட்சிமன்ற தலைவா்கள், துணைத் தலைவா்கள் கலந்துகொண்டனா்.