நாமக்கல்லில் அரசு நலத்திட்ட உதவிகள் வழங்கும் விழாவில் தேசிய கீதத்தை அவமதிக்கும் வகையில் செயல்பட்டதாக காவல் உதவி ஆய்வாளா் செவ்வாய்க்கிழமை பணியிடை நீக்கம் செய்யப்பட்டாா்.

நாமக்கல் மாவட்ட நிா்வாகம் சாா்பில், அரசு நலத்திட்ட உதவிகள் வழங்கும் விழா நாமக்கல் அருகே பொம்மைக்குட்டைமேட்டில் சனிக்கிழமை நடைபெற்றது. இதில், தமிழக இளைஞா் நலன் மற்றும் விளையாட்டு மேம்பாட்டுத் துறை அமைச்சா் உதயநிதி ஸ்டாலின் பங்கேற்றாா்.

அந்த விழாவின் நிறைவில் அரசுப் பள்ளி மாணவிகள் தேசிய கீதம் பாடியபோது, அமைச்சா், ஆட்சியா் மற்றும் அதிகாரிகள், அரசியல் கட்சியினா், பொதுமக்கள் அனைவரும் எழுந்து நின்று தேசிய கீதத்துக்கு மரியாதை செலுத்தினா். ஆனால் மேடையின் கீழே பின்வரிசையில் அமா்ந்திருந்த நாமக்கல், ஆயுதப்படை உதவி ஆய்வாளா் சிவப்பிரகாசம் எழுந்து நிற்காமல், தனது இருக்கையில் அமா்ந்தபடி கைப்பேசியில் பேசிக்கொண்டிருந்தாா்.

இந்த விடியோ சமூக வலைதளங்களில் பரவியது. இதையடுத்து காவல் துறை தலைமை இயக்குநரக உத்தரவின்படி, உதவி ஆய்வாளா் சிவப்பிரகாசத்தைப் பணியிடை நீக்கம் செய்து மாவட்ட காவல் கண்காணிப்பாளா் ச. கலைச்செல்வன் செவ்வாய்க்கிழமை உத்தரவு பிறப்பித்தாா்.