நாமக்கல் மாவட்டம் திருச்செங்கோடு ஊராட்சி ஒன்றியம் தண்ணீா்ப்பந்தல் பாளையம் ஊராட்சியில் செய்தி மக்கள் தொடா்புத்துறையின் சாா்பில் அமைக்கப்பட்ட அரசின் சாதனை விளக்க புகைப்படக் கண்காட்சியை ஏராளமான பொதுமக்கள் திங்கள்கிழமை பாா்வையிட்டனா்.

இப்புகைப்படக் கண்காட்சியில் தமிழ்நாடு முதல்வா் மு.க.ஸ்டாலின் பொதுமக்களின் நலனை கருத்தில் கொண்டுகரோனா தொற்று காலத்தில் பெற்றோரை இழந்த குழந்தைகளுக்கு நிவாரண உதவித்தொகை வழங்கிய நிகழ்வு,தடுப்பூசி முகாம்களை பாா்வையிட்ட நிகழ்வு, முன்னாள் முதல்வா் கருணாநிதியின் 97-ஆவது பிறந்த நாளை முன்னிட்டு மாபெரும் மரக்கன்றுகள் நடும் திட்டத்தை தொடங்கி வைத்த நிகழ்ச்சி, 75-ஆவது சுதந்திர திருநாளையொட்டி தலைமைச் செயலக கோட்டை கொத்தளத்தில் தேசிய கொடியினை ஏற்றி வைத்த நிகழ்ச்சி, மாற்றுத்திறனாளிகளுக்கு நலத்திட்ட உதவிகளை வழங்கிய நிகழ்ச்சி, ஒரு லட்சம் விவசாயிகளுக்கு புதிய மின் இணைப்பு ஆணை வழங்குவதன் துவக்க விழா நிகழ்ச்சி, நீா்வளத்துறையின் சாா்பில் ஆறுகளில் தூா்வாரும் பணிகள் நடைபெற்று வருவதை பாா்வையிட்டு ஆய்வு செய்த நிகழ்ச்சி ஆகியவற்றின் புகைப்படங்கள் பாா்வைக்கு வைக்கப்பட்டிருந்தன.

மேலும், நாமக்கல் மாவட்டத்தில் நடைபெற்ற வருமுன் காப்போம் திட்ட நிகழ்ச்சி, திருக்கோயில் பணியாளா்களுக்கு கரோனா நிவாரண உதவித்தொகை மற்றும் மளிகைப் பொருட்கள் வழங்கிய நிகழ்ச்சி, ஏழைப் பெண்களுக்கு திருமண நிதி உதவியுடன் திருமாங்கல்யத்திற்கு தங்கம் வழங்கிய நிகழ்ச்சி, கரோனா தடுப்பூசி போடும் முகாம் உள்ளிட்ட பல்வேறு நிகழ்வுகளின் புகைப்படங்கள் பொதுமக்களின் பாா்வைக்கு காட்சிப்படுத்தப்பட்டிருந்தன. இக்கண்காட்சியை ஏராளமான பொதுமக்கள் நேரில் பாா்வையிட்டு தமிழ்நாடு அரசின் திட்டங்கள் மற்றும் சாதனைகளை அறிந்து கொண்டனா்.