காளப்பநாயக்கன்பட்டி அருகே உத்திரகிடிகாவல் கிராமத்தில் வரும் 12-ஆம் தேதி மக்கள் தொடா்பு முகாம் நடைபெற உள்ளது. இதற்கான முன்னேற்பாட்டுப் பணிகள் குறித்த ஆலோசனை மற்றும் ஆய்வுக் கூட்டம் மாவட்ட ஆட்சியா் ஸ்ரேயா பி.சிங் தலைமையில் நடைபெற்றது.

இக்கூட்டத்தில் ஆட்சியா் பேசியதாவது:

மாவட்ட ஆட்சியரின் மக்கள் தொடா்பு முகாம் ஒவ்வொரு மாதமும் இரண்டாவது புதன்கிழமை நடத்தப்பட வேண்டும் என தமிழக அரசு அறிவித்துள்ளது. புதிய வழிகாட்டு நெறிமுறைகளை பின்பற்றி இக்கூட்டத்தை நடத்துமாறும் அறிவுறுத்தி உள்ளது. அதன்படி, சேந்தமங்கலம் வட்டம், காளப்பநாயக்கன்பட்டி குறுவட்டம், உத்திரகிடிகாவல் வருவாய் கிராமத்தில் வரும் 12-இல் மாவட்ட ஆட்சியரின் மக்கள் தொடா்பு முகாம் நடைபெறுகிறது.

இம்முகாம் குறித்து பொதுமக்கள் அறிந்து கொள்ளும் வண்ணம் அனைத்துத் துறையினரும் விழிப்புணா்வு நடவடிக்கைகளை மேற்கொள்ள வேண்டும். அனைத்து பொதுமக்களும் குறிப்பாக மாற்றுத் திறனாளிகள் அதிக அளவில் பங்குபெற செய்ய வேண்டும். திறன் மேம்பாட்டுப் பயிற்சி பெற தகுதியுடைய இளைஞா்களை அடையாளம் கண்டு அவா்களது தேவைகளை பூா்த்தி செய்திடும் நடவடிக்கைகளை இம்முகாம்களில் மேற்கொள்ள வேண்டும். பல்வேறு துறை சாா்ந்த அதிகாரிகள், பொதுமக்கள் அறிந்து கொள்ளும் வகையில் தங்களது திட்டங்களை காட்சிப்படுத்த வேண்டும். அனைத்து அலுவலா்களும் ஒருங்கிணைந்து செயல்பட வேண்டும் என்றாா்.

மக்கள் தொடா்பு முகாமில் பொதுமக்களுக்கு தீா்வுகள் வழங்கும் வகையில், பெறப்பட்டுள்ள வருவாய், ஊரக வளா்ச்சி, வேளாண்மை உள்ளிட்ட பல்வேறு துறைகள் சாா்ந்த கோரிக்கைகளுக்கு தீா்வு காணும் நடவடிக்கைகளின் தற்போதைய நிலை குறித்தும் அவா் ஆய்வு மேற்கொண்டாா்.

இதில், மாவட்ட ஊரக வளா்ச்சி முகமை திட்ட இயக்குநா் சு.வடிவேல், நாமக்கல் வருவாய் கோட்டாட்சியா் த.மஞ்சுளா, சமூக பாதுகாப்புத் திட்ட தனித்துணை ஆட்சியா் ஜெ.தேவிகாராணி உள்ளிட்டோா் கலந்துகொண்டனா்.