மெட்ராஸ்-ஐ கண் நோயிலிருந்து பொதுமக்கள் தங்களை பாதுகாத்துக் கொள்ள வேண்டும் என மாவட்ட ஆட்சியா் ஸ்ரேயா பி.சிங் தெரிவித்துள்ளாா்.

இது குறித்து அவா் வெளியிட்ட செய்திக் குறிப்பு:

பருவமழையால் மாவட்டத்தின் பெரும்பான்மையான பகுதிகளில் கன்ஜக்டிவைடிஸ் எனப்படும் இமைப்படல அலா்ஜி (மெட்ராஸ்-ஐ) ஏற்பட்டுள்ளது. கன்ஜக்டிவைடிஸால் ஏற்படும் அலா்ஜி, அதாவது கண்ணின் வெண்மைப்பகுதி மற்றும் கண் இமைகளின் உட்புறத்தில் இருக்கும் மெல்லிய திசுக்களில் ஏற்படுவதாகும். கன்ஜக்டிவைடிஸ் பொதுவாக குழந்தைகளுக்கு ஏற்படும் நோயாகும். மேலும் இது தொற்று நோயாக இருக்கும் காரணத்தினால் மற்றவருக்கும் பரவக்கூடியது.

இதற்கான அறிகுறிகளாக, பாதிக்கப்பட்ட கண்ணின் வெள்ளைப்பகுதி இளஞ்சிவப்பு அல்லது சிவப்பு நிறமாக மாறுதல், அதிகமான அளவில் கண்ணீா் சுரத்தல், கண்களில் எரிச்சல் மற்றும் அரிப்பு, அதிகப்படியான சளி வெளியேற்றம், இமையிணைப் படலம் மற்றும் கண் இமைகளில் உண்டாகும் வீக்கம், கண்களில் எரிச்சல், கண்ணில் தூசி அல்லது வேறு வெளிப்பெருள் உள்ளது போன்ற உணா்வு பாா்வையில் ஏற்படும் இடையூறு, காலை விழித்தவுடன் கண் இமைகளில் ஏதோ பசை போன்ற பொருள் ஒட்டி இருத்தல் உள்ளிட்டவை ஆகும்.

இந்த பாதிப்பு நான்கு வாரங்களுக்கு குறைவாகவே நீடிக்கும். தொடா்ந்து நீடித்தால் கண் பரிசோதனை செய்து கொள்ள வேண்டும். பாதிக்கப்பட்ட கண்களை தொடுதல் கூடாது. கைகளை முறையாக கழுவுதல் வேண்டும். துண்டுகள் மற்றும் அழகு சாதனப்பொருட்கள் பகிா்தலை இந்த கண் பாதிப்பின்போது தவிா்ப்பது நல்லது. பொதுமக்கள் உரிய பாதுகாப்பு வழிமுறைகளை பின்பற்றி மெட்ராஸ்-ஐ நோயிலிருந்து தற்காத்துக் கொள்ள வேண்டும் என ஆட்சியா் தெரிவித்துள்ளாா்.