நாமக்கல்லில், கொங்குநாடு மக்கள் தேசியக் கட்சி சாா்பில், நகராட்சி, பேரூராட்சிகளில் வெற்றி பெற்ற உள்ளாட்சிப் பிரதிநிதிகளுக்கான பாராட்டு விழா கொங்கு வேளாளா் திருமண அரங்கில் ஞாயிற்றுக்கிழமை நடைபெற்றது.
இவ்விழாவில், தெற்கு மாவட்டச் செயலாளா் வி.எஸ்.மாதேஸ்வரன் வரவேற்றுப் பேசினாா். கொங்கு வேளாளக் கவுண்டா்கள் பேரவை மாநிலத் தலைவா் ஆா்.தேவராசன், நாமக்கல் மக்களவை உறுப்பினா் ஏ.கே.பி.சின்ராஜ், மாநில விவசாய அணி துணைச் செயலாளா் சந்திரசேகா் ஆகியோா் வாழ்த்தி பேசினா்.
சிறப்பு அழைப்பாளா்களாக தமிழக சுற்றுலாத் துறை அமைச்சா் எம்.மதிவேந்தன், மாநிலங்களவை உறுப்பினா் கே.ஆா்.என்.ராஜேஷ்குமாா், சட்டப் பேரவை உறுப்பினா்கள் பெ.ராமலிங்கம், கே.பொன்னுசாமி ஆகியோா் கலந்து கொண்டனா். கொங்குநாடு மக்கள் தேசியக் கட்சி பொதுச்செயலாளரும், திருச்செங்கோடு சட்டப்பேரவை உறுப்பினருமான ஈ.ஆா்.ஈஸ்வரன், புதிதாக தோ்ந்தெடுக்கப்பட்ட திமுக, கொமதேக நகா்மன்ற, பேரூராட்சி உறுப்பினா்களை கெளரவித்து கேடயங்களை வழங்கினாா்.
இதில், நாமக்கல் நகராட்சி 39 வாா்டு உறுப்பினா்கள், எருமப்பட்டி, காளப்பநாயக்கன்பட்டி, சேந்தமங்கலம், மோகனூா் பேரூராட்சித் தலைவா், துணைத் தலைவா்கள் மற்றும் அவா்களது குடும்பத்தினா், கொமதேக நிா்வாகிகள் உள்ளிட்டோா் பங்கேற்றனா். இதற்கான ஏற்பாடுகளை கொமதேக தெற்கு மாவட்ட நிா்வாகிகள் செய்திருந்தனா்.
பெட்டிச் செய்தி
துபை பயணம்: முதல்வா் வெள்ளை அறிக்கை வெளியிடுவாா்
நாமக்கல்லில் கொமதேக சாா்பில் நடைபெற்ற பாராட்டு விழாவை தொடா்ந்து, பொதுச் செயலாளா் ஈ.ஆா்.ஈஸ்வரன் செய்தியாளா்களிடம் கூறியதாவது:
பெட்ரோல், டீசல், சமையல் எரிவாயு விலை உயா்வால் சாமானிய மக்கள் மிகவும் சிரமத்திற்குள்ளாகி வருகின்றனா். மத்திய அரசு இந்த விலை உயா்வை திரும்ப பெற வேண்டும். இல்லையெனில் கட்டுப்படுத்த நடவடிக்கை எடுக்க வேண்டும்.
தமிழக முதல்வா் மு.க.ஸ்டாலினின் துபை பயணத்தை கொச்சைப்படுத்தும் வகையில் பாஜக தலைவா் அண்ணாமலை பேசுவது சரியல்ல. வெளிநாட்டு முதலீடுகளை ஈா்க்கவே முதல்வா் அங்கு பயணம் மேற்கொண்டுள்ளாா். அவா் தமிழகம் திரும்பியவுடன் வெளிநாடு முதலீடு ஈா்ப்பு குறித்து வெள்ளை அறிக்கையை வெளியிடுவாா்.
தமிழகத்தில் அதிமுகவை அகற்ற, அழிப்பதற்கு உண்டான முயற்சிகளில் பாஜக ஈடுபட்டு வருவதாகத் தெரிகிறது. நீட் தோ்வு விவகாரத்தில் ஆளுநா் காலம் தாழ்த்துவதன் மூலம் மக்களிடம் வெறுப்பை சம்பாதிக்கிறாா்; மத்திய அரசுக்கு அவப்பெயரை ஏற்படுத்தி வருகிறாா் என்றாா்