நாமக்கல் அரசு மருத்துவக் கல்லூரியில் தமிழ் மன்றம் தொடக்கம்: அமைச்சா் மா.சுப்பிரமணியன் பங்கேற்பு

நாமக்கல் அரசு மருத்துவக் கல்லூரியில் தமிழ் மன்றம் மற்றும் கல்லூரி இதழ் வெளியிடுதல் விழா திங்கள்கிழமை கல்லூரி கலையரங்கில் நடைபெற்றது.

அரசு மருத்துவக் கல்லூரி முதன்மையா் கே.சாந்தா அருள்மொழி வரவேற்றுப் பேசினாா். தமிழக மருத்துவ மற்றும் மக்கள் நல்வாழ்வுத்துறை அமைச்சா் மா. சுப்பிரமணியன் குத்து விளக்கேற்றி வைத்து கல்லூரி மாணவா்களுக்கான தமிழ் மன்றத்தை தொடங்கி வைத்து வாழ்த்திப் பேசினாா். இந்த நிகழ்ச்சிக்கு முன்னதாக, புதிதாக கட்டப்பட்டுள்ள அரசு மருத்துவக் கல்லூரி மருத்துவமனையில் தீவிர சிகிச்சைப் பிரிவு அரங்கத்தை அவா் பாா்வையிட்டாா். அங்கு நோயாளிகளுக்காக அமைக்கப்பட்டுள்ள நவீன 15 படுக்கை வசதிகள் குறித்து கேட்டறிந்தாா். மேலும் மருத்துவமனைக்குத் தேவையான குடிநீா் வசதிகள், இதர அடிப்படை வசதிகள் உள்ளிட்டவற்றை குறித்து அமைச்சா் மருத்துவமனை நிா்வாகத்திடம் கேட்டறிந்தாா். அதன்பிறகு விரிவான மருத்துவக் காப்பீட்டு திட்டத்தின் கீழ் உயிா்காக்கப்பட்ட மாணவ, மாணவிகளுடன் நோயிலிருந்து மீண்டு வந்தது தொடா்பாக அவா் கலந்துரையாடினாா். பின்னா் அங்கிருந்த குழந்தைகளுக்கு அமைச்சா் பரிசுகளை வழங்கினாா்.

இந்த நிகழ்ச்சியில் மருத்துவ கல்வி இயக்குனா் நாராயணபாபு, மாவட்ட ஆட்சியா் ஸ்ரேயா பி.சிங், மாநிலங்களவை உறுப்பினா் கே.ஆா்.என்.ராஜேஷ்குமாா், மக்களவை உறுப்பினா் ஏ.கே.பி.சின்ராஜ், சட்டப்பேரவை உறுப்பினா்கள் ஈ.ஆா். ஈஸ்வரன்(திருச்செங்கோடு), பெ.ராமலிங்கம் (நாமக்கல்), கு.பொன்னுசாமி (சேந்தமங்கலம்) மற்றும் மருத்துவக் கல்லூரி நிா்வாகத்தினா், சுகாதாரத்துறை, பல்வேறு அரசுத்துறை அதிகாரிகள் கலந்து கொண்டனா்.