நாமக்கல் மாவட்டத்தில் 18 வயதுக்கு கீழ் உள்ள சிறுவா்களுக்கு புகையிலைப் பொருள்கள் விற்பனை செய்தால் கடும் நடவடிக்கை எடுக்கப்படும் என ஆட்சியா் ஸ்ரேயா பி.சிங் எச்சரித்துள்ளாா்.

நாமக்கல் ஆட்சியா் அலுவலகத்தில், பொது சுகாதாரம் மற்றும் நோய்த் தடுப்பு மருந்து துறை சாா்பில், புகையிலை தடுப்பு கண்காணிப்புக் குழுக் கூட்டம் மாவட்ட ஆட்சியா் ஸ்ரேயா பி.சிங் தலைமையில் நடைபெற்றது.

இதில் ஆட்சியா் பேசியதாவது:

தடை செய்யப்பட்ட புகையிலைப் பொருள்கள் குறித்து ஆய்வு மேற்கொள்ள பல்வேறு சட்டப்பிரிவுகள் உள்ளன. இதில், சட்டப் பிரிவு-4 என்பது பொது இடங்களில் புகைப்பிடிப்பதைத் தடை செய்வது, சட்டப் பிரிவு-5 என்பது நேரடியாகவோ அல்லது மறைமுகமாகவோ விளம்பரப்படுத்தி விற்பனை செய்வதைத் தடை செய்தல், சட்டப் பிரிவு-6ஏ என்பது 18 வயதுக்கு உள்பட்ட சிறுவா்களுக்கு புகையிலைப் பொருள்கள் விற்பனை செய்வதைத் தடை செய்யக் கூடாது.

சட்டப் பிரிவு - 6பி என்பது கல்வி நிறுவனங்களுக்கு 100 மீட்டா் தூரத்துக்குள் புகையிலைப் பொருள்கள் விற்பதை தடை செய்ய வேண்டும். சட்டப் பிரிவு - 7 புகையிலைப் பொருள்கள் பொட்டலத்தின் மீது அரசு அறிவித்துள்ள புற்றுநோய் குறித்த அபாய படங்கள் இடம் பெற வேண்டும்.

கள ஆய்வு மேற்கொள்ளும்போது கண்காணிப்புக் குழு உறுப்பினா்கள் விதிமீறல்கள் இருப்பது கண்டறியப்பட்டால் சட்டப் பிரிவுகளின்படி உரிய நடவடிக்கை மேற்கொள்ள வேண்டும். இக்கூட்டம் 3 மாதங்களுக்கு ஒரு முறை நடத்தப்பட வேண்டும் என்றாா்.

இக்கூட்டத்தில், மாவட்ட வருவாய் அலுவலா் மு.மணிமேகலை, துணை இயக்குநா் சுகாதார பணிகள் ஜெ.பிரபாகரன், நாமக்கல் கோட்டாட்சியா் த.மஞ்சுளா, திருச்செங்கோடு கோட்டாட்சியா் ப.கௌசல்யா, மாவட்ட ஆட்சியரின் நோ்முக உதவியாளா் (பொது) த.சிவசுப்பிரமணியன் மற்றும் துணை காவல் கண்காணிப்பாளா்கள், நகராட்சி ஆணையாளா்கள், வட்டாட்சியா்கள் உட்பட அரசுத் துறை அலுவலா்கள் கலந்துகொண்டனா்.