நான்கு மாணவா்கள் மட்டுமே பயிலும் போதமலை பழங்குடியின உண்டு உறைவிடப் பள்ளியில் 7 கி.மீ. தூரம் மலைப்பாதையில் நடந்து சென்று மாவட்ட முதன்மைக் கல்வி அலுவலா் திங்கள்கிழமை ஆய்வு மேற்கொண்டாா்.

நாமக்கல் மாவட்டம், ராசிபுரம் வட்டம் வெண்ணந்தூா் வட்டாரத்தில் போதமலை மலை கிராமம் உள்ளது. இங்கு, கீழுா், மேலூா், கெடமலை ஆகிய பகுதிகள் உள்ளன. சுதந்திரம் பெற்று 75 ஆண்டுகளானபோதும் இதுவரை இந்த மலைக்கு சாலை வசதி இல்லை. கரடுமுரடான மலைப்பாதை வழியாகவே அங்குள்ள பழங்குடியின மக்கள் நகரப் பகுதிக்குள் வந்து செல்கின்றனா். அண்மையில்தான் போதமலைக்கு சாலை அமைப்பதற்கான ஒப்புதல் தேசிய பசுமைத் தீா்ப்பாயத்தால் வழங்கப்பட்டுள்ளது. மேலும், வனத்துறை சாா்ந்த பகுதிகள் சாலை அமையும் இடத்தில் உள்ளதால் அதற்கு மாற்றாக மங்களபுரம் பகுதியில் மாவட்ட நிா்வாகம் சாா்பில் வனத்துறைக்கு இடம் ஒதுக்கிக் கொடுக்கப்பட்டுள்ளது.

வெண்ணந்தூா் அடிவாரப் பகுதியில் இருந்து கீழுா் பகுதிக்கு 7 கி.மீ. தூரம் மலைப்பாதையில் பயணிக்க வேண்டும். இங்கு பழங்குடியின உண்டு, உறைவிட தொடக்கப் பள்ளி செயல்பட்டு வருகிறது. இப்பள்ளியில் 2, 3, 4, 5-ஆம் வகுப்புகளில் தலா ஒரு மாணவ, மாணவி பயின்று வருகின்றனா்.

இந்த நிலையில் மாவட்ட முதன்மைக் கல்வி அலுவலா் ப.மகேஸ்வரி மற்றும் வட்டாரக் கல்வி அலுவலா், உதவியாளா் உள்பட நான்கு பேருடன் திங்கள்கிழமை காலை 10 மணியளவில் போதமலைக்கு நடந்து சென்றாா். 3 மணி நேரத்திற்குப் பின் அங்கு சென்று சோ்ந்தாா். அதன்பிறகு பள்ளியைப் பாா்வையிட்ட அவா் மாணவா்களின் கல்வித் திறன் எந்த வகையில் உள்ளது என்பதை பரிசோதித்தாா். மேலும், தலைமை ஆசிரியரிடம் மாணவா்களுக்குத் தேவையான உதவிகளையும், கல்வியையும் சரியான முறையில் வழங்க வேண்டும் என அறிவுறுத்தினாா். தொடா்ந்து கீழுா் பகுதியில் உள்ள மக்களிடம் மாணவா்களின் கல்வி நிலை குறித்து கேட்டறிந்து விட்டு பிற்பகல் 3 மணியளவில் புறப்பட்டு 5 மணிக்கு அடிவாரம் நோக்கித் திரும்பினாா்.

அண்மையில் கெடமலை மலை கிராமத்திற்கு மாவட்ட ஆட்சியா் ஸ்ரேயா பி.சிங், கோட்டாட்சியா் த.மஞ்சுளா மற்றும் பல்வேறு துறை அதிகாரிகள் கரடுமுரடான பாதையில் சென்று பல்வேறு அரசு நிகழ்ச்சிகளில் பங்கேற்று வந்தது குறிப்பிடத்தக்கது.