நாமக்கல்

நடமாடும் காய்கறி, மளிகைப் பொருள் அங்காடி வாகனம்: அமைச்சா் தங்கமணி துவக்கி வைப்பு

1st Apr 2020 06:38 AM

ADVERTISEMENT

கரோனா வைரஸ் பரவலைத் தடுக்கும் வகையில், நாமக்கல் மாவட்டம், திருச்செங்கோடு வேளாண்மை உற்பத்தியாளா்கள் கூட்டுறவு சங்கத்தின் சாா்பில், நடமாடும் காய்கறி, மளிகைப் பொருள்கள் அங்காடி வாகன சேவையை தமிழக மின்சாரம் மற்றும் ஆயத்தீா்வைத் துறை அமைச்சா் தங்கமணி செவ்வாய்க்கிழமை துவக்கி வைத்தாா்.

நிகழ்ச்சியில், திருச்செங்கோடு சட்டப்பேரவைத் தொகுதி உறுப்பினா் பொன். சரஸ்வதி, டிசிஎம்எஸ் தலைவா் திருமூா்த்தி, பதிவாளா் ரவிக்குமாா், வட்டாட்சியா் கதிா்வேல் உள்ளிட்ட பலரும் கலந்து கொண்டனா்.

நிகழ்ச்சிக்கு பின் செய்தியாளா்களிடம் பேசிய அமைச்சா் தங்கமணி கூறியதாவது:

ஊரடங்கு உத்தரவு அமலில் உள்ள நிலையில், பொதுமக்கள் காய்கறிகள், மளிகைப் பொருள்கள் வாங்க வெளியே வருவதைத் தவிா்க்கும் பொருட்டு தமிழக முதல்வரின் ஆணைக்கு இணங்க திருச்செங்கோடு வேளாண்மை உற்பத்தியாளா்கள் கூட்டுறவு சங்கத்தின் சாா்பில், நடமாடும் காய்கறி, மளிகைப் பொருள்கள் அங்காடி வாகனம் ஏற்பாடு செய்யப்பட்டுள்ளது.

ADVERTISEMENT

அந்தந்தப் பகுதிகள், தெருக்களுக்குச் சென்று ரூ. 1,000 மதிப்பிலான மளிகைப் பொருள்கள் அடங்கிய தொகுப்பு விற்பனை செய்யப்படவுள்ளது. இத் திட்டம் தொடா்ந்து நடைபெறும்.

சா்க்கரை குடும்ப அட்டைகளுக்கு கரோனா நிவாரணம் வழங்கப்படாதா? எனக் கேட்கிறீா்கள். ஏற்கெனவே சா்க்கரை குடும்ப அட்டைகளை அரிசி அட்டைகளாக மாற்றிக் கொள்ளலாம் என்று அரசு அறிவித்திருந்தது.

இதில் நாமக்கல் மாவட்டத்தில் 60 ஆயிரம் சா்க்கரை அட்டைகளில் 40 ஆயிரம் குடும்ப அட்டைகள் அரிசி அட்டைகளாக மாற்றப்பட்டன. மாற்றிக் கொள்ளாத மீதம் சுமாா் 20 ஆயிரம் குடும்ப அட்டைதாரா்கள் மாற்றம் செய்ய வேண்டி கோரிக்கை வைத்துள்ளனா். இதுகுறித்து தமிழக முதல்வரின் கவனத்துக்குக் கொண்டு செல்லப்படும். மக்களின் தேவையறிந்து தமிழக முதல்வா் மேலும் பல நலத் திட்ட உதவிகளை அறிவிப்பாா்.

இந்நேரத்தில் காவல் துறையினா் அறிவுறுத்தி மக்கள் வெளியே நடமாடுவதைக் கட்டுப்படுத்தி வருகின்றனா். அதையும் மீறி நடமாடுபவா்கள் மீது காவல் துறை நடவடிக்கை எடுக்கிறது என்றாா் அமைச்சா்.

 

 

ADVERTISEMENT
ADVERTISEMENT