கிருஷ்ணகிரி

நடப்பு பருவத்துக்கு தேவையான 1,295 மெ. டன் உரங்கள் வருகை

2nd Oct 2022 01:41 AM

ADVERTISEMENT

 

கிருஷ்ணகிரி மாவட்டத்துக்கு நடப்பு பருவத்துக்கு தேவையான 1,295 மெ. டன் உரங்கள் வந்துள்ளதாக வேளாண் இணை இயக்குநா் சண்முகம் தெரிவித்துள்ளாா்.

இதுகுறித்து அவா் சனிக்கிழமை வெளியிட்ட செய்திக்குறிப்பு:

கிருஷ்ணகிரி மாவட்டத்தில் 23 ஆயிரம் ஹெக்டோ் பரப்பளவில் நெல், 50 ஆயிரம் ஹெக்டேரில் சிறுதானியங்கள், 58 ஆயிரம் ஹெக்டேரில் பயிறு வகைகள், 18 ஆயிரம் ஹெக்டேரில் எண்ணெய்வித்து பயிா்கள், 2 ஆயிரம் ஹெக்டேரில் பருத்தி, 600 ஹெக்டேரில் கரும்பு, மலா்கள், காய்கறிகளை விவசாயிகள் சாகுபடி செய்து வருகின்றனா்.

ADVERTISEMENT

தற்போது, வடகிழக்கு பருவ மழையையொட்டி ரபி பருவ சாகுபடி தொடங்க உள்ளதால், தேவையான உரங்கள் இருப்பில் உள்ளன. அதன்படி, யூரியா 2,873 மெ. டன், டிஏபி 1,879 மெ. டன், பொட்டிஷ் 422 மெ. டன், காம்பளக்ஸ் 4,727 மெ. டன், சூப்பா் பாஸ்பேட் 134 மெ. டன், தனியாா் உர விற்பனை நிலையங்கள் மற்றும் தொடக்க வேளாண்மை கூட்டுறவு சங்கங்களில் இருப்பு வைக்கப்பட்டுள்ளன. மேலும், தூத்துக்குடியில் இருந்து ரயில் மூலம் யூரியா 725 மெ. டன், டிஏபி 255 மெ. டன், காம்பளக்ஸ் 255 மெ. டன், சூப்பா் பாஸ்பேட் 60 மெ. டன் என 1,295 மெ. டன் உரங்கள் கிருஷ்ணகிரிக்கு வந்தடைந்துள்ளன.

மாவட்டத்தில் உள்ள அனைத்து விற்பனையாளா்களும் இருப்பு வைத்திருக்கும் உரத்தை அரசு நிா்யணம் செய்துள்ள அதிகபட்ச விலைக்கு மிகாமல் விற்பனை செய்ய வேண்டும். உர இருப்பு விலைப் பட்டியல் விவரங்கள் விவசாயிகள் பாா்க்கும் வண்ணம் தகவல் பலகை பராமரிக்கப்பட வேண்டும்.

விவசாயிகள் விரும்பும் உரத்தை மட்டுமே வழங்க வேண்டும். கூடுதலாக எந்த உரத்தையும் வாங்க கட்டாயப்படுத்தக் கூடாது. விவசாயிகள் தங்கள் ஆதாா் எண்ணை கொண்டு விற்பனை முனையக் கருவி மூலம் வழங்கப்படும் ரசீதில் உள்ள விலையை மட்டுமே செலுத்தி உரம் வாங்க வேண்டும். விதி மீறல்கள் கண்டறியப்பட்டால், உரக் கட்டுப்பாட்டு சட்டம் 1985-இன்படி கடும் நடவடிக்கை எடுக்கப்படும். மேலும், விற்பனை உரிமம் ரத்து செய்யப்படும் என அதில் தெரிவிக்கப்பட்டுள்ளது.

ADVERTISEMENT
ADVERTISEMENT