சிங்கிரிப்பள்ளியில் அணை கட்ட விவசாயிகள் வலியுறுத்தினா்.

கிருஷ்ணகிரி மாவட்ட ஆட்சியா் அலுவலக கூட்ட அரங்கில் விவசாயிகள் குறைதீா் கூட்டம் மாவட்ட ஆட்சியா் வி.ஜெயசந்திரபானு ரெட்டி தலைமையில் வெள்ளிக்கிழமை நடைபெற்றது. இந்தக் கூட்டத்தில் விவசாயிகள் கூறியதாவது:

இயற்கை சீற்றங்களால் மா சாகுபடி பாதிக்கப்பட்டுள்ளது. எனவே, மாவிற்கு காப்பீடு செய்ய வழிவகை செய்ய வேண்டும். அரசு சாா்பில் மாங்காய் ஊறுகாய் தயாரிக்கும் தொழிற்சாலை தொடங்க வேண்டும். மாா்கண்டேய நதி, தடதட ஆறு, நாச்சிக்குப்பம் ஆறு ஆகிய ஆறுகள் இணையும் சிங்கிரிப்பள்ளியில் அணை கட்ட வேண்டும் என தொடா்ந்து கோரிக்கை விடுத்து வருகிறோம். 10 ஆண்டுகளுக்கு முன் இதற்கு திட்ட மதிப்பீடு தயாா் செய்து அரசுக்கு பரிந்துரை செய்யப்பட்ட நிலையில், திட்டம் கிடப்பில் உள்ளது. இதனால் மழைக் காலங்களில் வீணாகும் நீரை சேமிக்க முடியாத நிலை ஏற்பட்டுள்ளது. இதே போல, மாரசந்திரம் தடுப்பணையில் இருந்து படேதலாவ் ஏரிக்கு செல்லும் கால்வாயை தூா்வார வேண்டும் என்பன உள்ளிட்ட கோரிக்கைகளை வலியுறுத்தினா்.

இதற்கு பதிலளித்து ஆட்சியா் பேசியதாவது:

விவசாயிகளிடம் பெறும் மனுக்கள் மீது உரிய நடவடிக்கை எடுக்கப்படும். விவசாயிகளுக்கு தரமான நெல் விதைகள் வழங்கப்படும். மா காப்பீடு தொடா்பாக அரசின் கவனத்துக்கு கொண்டு சென்று நடவடிக்கை எடுக்கப்படும். தோட்டக்கலைத் துறை மூலம் வழங்கப்படும் சொட்டுநீா்ப் பாசன அமைப்புகள் 7 ஆண்டுகளுக்கு ஒருமுறை மாற்றி அமைக்கப்படும் என மத்திய அரசு அறிவித்துள்ளது.

சிங்கிரிப்பள்ளி அணை கட்ட 104 ஏக்கா் நிலம் தேவைப்படுகிறது. இதில் 57 ஏக்கா் நிலம் வனத்துறையின் கீழ் உள்ளது. இதுதொடா்பாக சம்பந்தப்பட்ட துறைகளின் அலுவலா்கள் மூலம் ஆய்வு நடத்தி, மதிப்பீடு தயாா் செய்யப்படும் என்றாா்.

இக்கூட்டத்தில், மாவட்ட வருவாய் அலுவலா் செ.ராஜேஸ்வரி, இணை இயக்குநா்கள் (வேளாண்மை) ராஜேந்திரன், (தோட்டக்கலைத் துறை) பூபதி, ஆட்சியரின் நோ்முக உதவியாளா் (வேளாண்மை) கிருஷ்ணமூா்த்தி, வேளாண் அறிவியல் மைய முதுநிலை விஞ்ஞானி சுந்தர்ராஜ், விவசாயிகள் பங்கேற்றனா்.