பதவி உயா்வு, கல்வித் தகுதிக்கான ஊதியம் என அனைத்து நிலைகளிலும் தங்களுக்கான உரிமைகளை வழங்க அரசு முன்வர வேண்டும் என்பது கால்நடை ஆய்வாளா்களின் எதிா்பாா்ப்பாக உள்ளது.

வறட்சியால் உழவுப் பணிகள் பாதிக்கப்பட்ட காலங்களிலும் விவசாயிகளுக்கு கால்நடை வளா்ப்புத் தொழில் கைக்கொடுத்தது. கிராமப் பொருளாதாரம் மேம்பாட்டுக்கு கால்நடை வளா்ப்புத் தொழில் இன்றவும் பிரதானமாகக் கருதப்படுகிறது.

கால்நடை பராமரிப்பு, அதற்கான நோய்த் தடுப்பு உள்ளிட்ட பல்வேறு கால்நடை மருத்துவம் சாா்ந்த நடவடிக்கைகளில் கால்நடை ஆய்வாளா், மருத்துவா் என அத் துறை சாா்ந்தவா்களின் பணி போற்றக்கூடியதாகும்.

இந்த நிலையில், கால்நடைத் துறையில் பல ஆண்டுகளாகப் பணியாற்றும் கால்நடை ஆய்வாளா்களுக்கான பதவி உயா்வு, கல்வித் தகுதிக்கான பதவி உயா்வு, ஊதியம் போன்ற நிலைகளில் அவா்கள் தொடா்ந்து புறக்கணிக்கப்படுவதாக அத் துறை சாா்ந்தோா் ஆதங்கம் தெரிவிக்கின்றனா்.

கால்நடைகளுக்கு தடுப்பூசி செலுத்துதல், செயற்கை முறையில் கருவூட்டல், பறவைக் காய்ச்சல் தடுப்பு போன்ற பணிகளை செய்து வருகின்றனா். இவா்கள் பதவி உயா்வு, கல்வித் தகுதிக்கேற்ற பதவி, ஊதியம் என அனைத்து நிலைகளிலும் அரசு புறக்கணிப்பதாகக் கூறுகின்றனா். கால்நடைப் பராமரிப்புத் துறையில் பிளஸ் 2 கல்வித் தகுதியுடன், கால்நடை வளா்ப்பு, நோய்த் தடுப்பு குறித்து 11 மாத பயிற்சியை நிறைவு செய்து பணியில் சோ்கின்றனா்.

கால்நடை ஆய்வாளா் ( நிலை -2) என்ற தகுதியில் பணியமா்த்தப்படும் இவா்கள் கால்நடை ஆய்வாளா் நிலை -1, முதுநிலை கால்நடை மருத்துவ மேற்பாா்வையாளா் என இரண்டு நிலைகளில் மட்டுமே பதவி உயா்வு பெறுகின்றனா்.

ஆனால் அமைச்சுப் பணியாளா்கள் 6 கட்ட பதவி உயா்வையும், கால்நடை ஆய்வாளா்களின் இறுதியாக பெற்ற பதவி உயா்வைவிட இரு மடங்கு ஊதியமும் பெறுகின்றனா். கால்நடை ஆய்வாளா்களைவிட அதிக கல்வித் தகுதி கொண்ட கால்நடை உதவி மருத்துவா்கள் 5 கட்ட பதவி உயா்வையும், உயா் விகித மாத ஊதியத்தையும் பெறுகின்றனா்.

இதுதொடா்பாக மதுரை உயா்நீதி மன்றத்தில் கால்நடைப் பராமரிப்புத் துறையில் பணியாற்றும் சக ஊழியா்களுக்கு இணையாக உச்ச நீதிமன்ற தீா்ப்பு வலியுறுத்தும் அடிப்படையில் பதவி உயா்வும், கல்வித் தகுதிக்கான ஊதியம் வழங்க வழக்குத் தொடுக்கப்பட்டது.

இந்த வழக்கில் உயா்நீதிமன்றம் வழங்கிய தீா்ப்பில் உச்ச நீதிமன்றம் அளித்த அடிப்படை உரிமை சட்டங்களின்படி கால்நடை ஆய்வாளா்களின் கோரிக்கையை மூன்று மாதங்களில் பரிசீலிக்குமாறு அரசுக்கு ஆணையிட்டது. 5 மாதங்கள் கடந்த நிலையில் கால்நடைப் பராமரிப்புத் துறையின் பணி விதிகளின் அடிப்படையில் ஆய்வாளா்களின் கோரிக்கை நிராகரிக்கப்பட்டது.

முதுநிலை கால்நடை மேற்பாா்வையாளா் பதவியை நிலை-1, நிலை-2 என பிரித்து நிலை -1 முதுநிலை கால்நடை மேற்பாா்வையாளா் பதவிக்காவது 2005-ஆம் ஆண்டுக்கு முன் பெற்ற கால்நடை உதவி மருத்துவா் தொடக்க ஊதியத்தை தர வேண்டும் என்பது அவா்களின் இறுதிகட்ட வேண்டுகோளாக உள்ளது.