கிருஷ்ணகிரி

ஒசூா் மாநகராட்சியில் திட்டப் பணிகளை ஆய்வு செய்தாா் ஆட்சியா்

9th Dec 2022 12:51 AM

ADVERTISEMENT

ஒசூா் மாநகராட்சியில் ரூ. 4.50 கோடி மதிப்பில் நடைபெற்று வரும் திட்ட பணிகளை மாவட்ட ஆட்சியா் வி.ஜெயசந்திர பானுரெட்டி வியாழக்கிழமை நேரில் பாா்வையிட்டு ஆய்வு மேற்கொண்டாா்.

தளி சாலையில் நமக்கு நாமே திட்டத்தின் கீழ் டைட்டான் நிறுவனம் மற்றும் ஒசூா் மாநகராட்சி இணைந்து 2021-22-ஆம் நிதியாண்டில் 1 ஏக்கா் பரப்பளவில் உள்ள அடா் வனப் பூங்காவில் ரூ.25 லட்சம் மதிப்பில் தரைதள கடிகாரம் அமைக்கும் பணிகளையும் ஏ.எஸ்.டி.சி ஹட்கோவில் செயல்பட்டு வரும் நுண்ணுயிா் செயலாக்க மையத்தில் மாநகராட்சியிலிருந்து நாள்தோறும் 5 முதல் 7 டன் வரை சேகரிக்கப்படும் குப்பைகளை தரம் பிரித்து உரம் தயாரிக்கும் பணிகளையும், உரங்கள் பொதுமக்களுக்கு விநியோகம் செய்யும் பதிவேடுகளையும் ஆட்சியா் நேரில் பாா்வையிட்டு ஆய்வு மேற்கொண்டாா்.

கிருஷ்ணகிரி மாவட்டம், ஒசூா் மாநகராட்சி அலுவலகத்தில் நடைபெற்று வரும் வளா்ச்சித் திட்ட பணிகள், வரி வசூல், சுகாதார தூய்மைப் பணிகள், திடக்கழிவு மேலாண்மை பணிகள் உள்ளிட்ட பல்வேறு பணிகளின் பதிவேடுகளை நேரில் பாா்வையிட்டு ஆய்வு செய்தாா். மேலும், அடிப்படைக் கட்டமைப்பு வசதிகள் நடைபெற்று வரும் பணிகள் குறித்து மாவட்ட ஆட்சியா், மாநகராட்சி ஆணையா் கு.பாலசுப்பிரணியன் மற்றும் அலுவலா்களுடன் ஆய்வு மேற்கொண்டாா்.

தொடா்ந்து, ஒசூா் மாநகராட்சிக்குட்பட்ட சாணசந்திரம் பகுதியில் 2021-22-ஆம் நிதியாண்டில் மூலதன நிதியிலிருந்து ரூ.1 கோடியே 50 லட்சம் மதிப்பில் கட்டப்பட்டு வரும் தகன எரிவாயு மேடை கட்டுமான பணிகளையும், காமராஜா் நகா் -2-வது தெருவில் ஏற்கெனவே பயன்பாட்டில் உள்ள பொதுக்கழிப்பறையில் சுகாதார பணிகள், தூய்மைப் பணிகளையும், ராம்நகா் பகுதியில் ஏற்கனவே இயங்கி வரும் பொது சுகாதார வளாகத்தில்பொதுமக்கள் பயன்பாடு மற்றும் கீ.ஆா் கோடு மூலம் புகாா் அளிக்கும் பணிகளை நேரில் பாா்வையிட்டு, சுகாதார வளாகத்தை தூய்மையாக வைத்திருக்குமாறு தூய்மைப் பணியாளா்களுக்கு உத்தரவிட்டாா்.

ADVERTISEMENT

சூசூவாடி பகுதியில் 15-ஆவது நிதிக்குழு திட்டத்தின் கீழ் ரூ. 25 லட்சம் மதிப்பில் நகா்ப்புற மேம்பாட்டு ஆரம்ப சுகாதார நிலைய கட்டுமான பணிகளையும், மூலதன நிதியிலிருந்து 2021-22-ஆம் நிதியாண்டில் ரூ. 2 கோடியே 50 லட்சம் மதிப்பில் 10 லட்சம் லிட்டா் கொள்ளளவு கொண்ட மேல்நிலை நீா்த்தேக்கத் தொட்டிக்கு அடித்தளம் அமைக்கும் பணிகளை நேரில் பாா்வையிட்டு ஆய்வு செய்து, நீா்த்தேக்கத் தொட்டியின் கட்டுமானபணிகள் தரமாகவும், விரைவாகவும் முடித்து பொதுமக்களின் பயன்பாட்டிற்கு விரைந்து வழங்க வேண்டும் என அலுவலா்களுக்கு மாவட்ட ஆட்சியா் உத்தரவிட்டாா்.

இந்த ஆய்வின்போது, ஒசூா் மாநகராட்சி ஆணையா் கு.பாலசுப்பிரமணியன், மாநகராட்சிப் பொறியாளா் ராஜேந்திரன் உள்ளிட்ட பலா் கலந்து கொண்டனா்.


 

ADVERTISEMENT
ADVERTISEMENT