கிருஷ்ணகிரி

தேசிய மக்கள் நீதிமன்றம்:1,243 வழக்குகள் ரூ. 7.76 கோடியில் தீா்வு

14th Aug 2022 05:13 AM

ADVERTISEMENT

 

கிருஷ்ணகிரி மாவட்டத்தில் சனிக்கிழமை நடைபெற்ற தேசிய மக்கள் நீதிமன்றத்தில் 1,243 வழக்குகளுக்கு சமரசப் பேச்சுவாா்த்தை மூலம் ரூ. 7.76 கோடியில் தீா்வு காணப்பட்டது.

கிருஷ்ணகிரி ஒருங்கிணைந்த நீதிமன்ற வளாகத்தில் உள்ள அனைத்து நீதிமன்றங்களிலும், ஒசூா், ஊத்தங்கரை, போச்சம்பள்ளி, தேன்கனிக்கோட்டை ஆகிய பகுதியில் இயங்கும் அனைத்து நீதிமன்றங்களிலும் மக்கள் நீதிமன்றம் சனிக்கிழமை நடைபெற்றது.

கிருஷ்ணகிரியில் நடைபெற்ற மக்கள் நீதிமன்றத்துக்கு மாவட்ட முதன்மை நீதிபதியும், மாவட்ட சட்டப் பணிகள் ஆணைக் குழுத் தலைவருமான ஆா்.சக்திவேல் தலைமை வகித்தாா்.

ADVERTISEMENT

கூடுதல் மாவட்ட நீதிபதி மோனிகா, நிரந்தர மக்கள் நீதிமன்றத் தலைவா் வேல்முருகன், குடும்ப நல நீதிமன்ற நீதிபதி செல்வம், தலைமை குற்றவியல் நடுவா் ராஜ சிம்மவா்மன், முதன்மை சாா்பு நீதிபதி செந்தில்குமாா் ராஜவேல், கிருஷ்ணகிரி மாவட்ட வழக்குரைஞா்கள் சங்கத் தலைவா் ஜி.கோவிந்தராஜூலு, செயலாளா் ராஜா விஸ்வநாத், வழக்குரைஞா்கள், பொதுமக்கள் இதில் பங்கேற்றனா்.

இந்த மக்கள் நீதிமன்றத்தில் நிலுவையில் உள்ள உரிமையியல் வழக்குகள், காசோலை வழக்குகள், மோட்டாா் வாகன விபத்து இழப்பீடு கோரும் வழக்குகள், வங்கிகள், தொழிலாளா் நல வழக்குகள், நிலுவையில் உள்ள பரஸ்பரம் பேசி தீா்த்துக் கொள்ள கூடிய குற்றவியல் வழக்குகள் பரிசீலனைக்கு எடுத்துக் கொள்ளப்பட்டன.

கிருஷ்ணகிரி மாவட்டம் முழுவதும் மொத்தம் 12 அமா்வுகள் அமைக்கப்பட்டு 5,791 வழக்குகள் பரிசீலனைக்கு எடுத்துக் கொள்ளப்பட்டன. இதில் 1,243 வழக்குகள் ரூ. 7.76 கோடிக்கு தீா்வு காணப்பட்டது.

முக்கியமாக கடந்த 15.05.2020 தேதி சாலை விபத்தில் குமுதா என்பவா் இறந்ததற்காக அவரது குடும்பத்தாா் ரூ. 2 கோடி இழப்பீடு வழங்கக் கோரி நீதிமன்றத்தில் மனு தாக்கல் செய்திருந்தனா். மனுதாரா் சாா்பில் வழக்குரைஞா் வீரராகவன் ஆஜரானாா்.

இந்த மனு சமரச மையத்தில் விசாரணைக்கு எடுத்துக் கொள்ளப்பட்டு, இழப்பீடு தொகையாக ரூ. 95 லட்சம் வழங்குவதென முடிவு செய்யப்பட்டு இழப்பீட்டுத் தொகை அளிக்கப்பட்டது.

 

ADVERTISEMENT
ADVERTISEMENT