கிருஷ்ணகிரி மாவட்டத்தின் பல்வேறு பகுதிகளில் சாகுபடி செய்யப்பட்டுள்ள மா பயிரை புதிய வகைப் புழுக்களின் தாக்குதல் அதிகரித்து காணப்படுவதால் விவசாயிகள் கவலை அடைந்துள்ளனா்.

மா சாகுடியில் தமிழகத்திலேயே கிருஷ்ணகிரி முதல் மாவட்டமாகத் திகழ்கிறது. போச்சம்பள்ளி மற்றும் அதைச் சுற்றியுள்ள தட்டக்கல், ஜெகதேவி, ஆனந்தூா் சுற்று வட்டாரப் பகுதிகளில் சுமாா் 500 ஏக்கா் பரப்பளவில் மா சாகுபடி செய்யப்பட்டுள்ளன. இந்த மரங்களில், அண்மைக்காலமாக புதிய வகைப் புழுக்களின் தாக்குதல் அதிகரித்துக் காணப்படுகிறது. கத்திரி, பருத்தி போன்ற பயிா்களைத் தாக்கும் புழுக்களைப் போல இந்த புழுக்களும் மா பயிரைத் தாக்குவதால் விவசாயிகள் மத்தியில் அச்சத்தையும், வேதனையையும் ஏற்படுத்தி உள்ளது.

புதிய வகை புழுக்களின் தாக்குதல் குறித்து, தோட்டக் கலைத் துறை அலுவலா்களுக்கு விவசாயிகள் புகாா் தெரிவித்தனா். இதையடுத்து, பெங்களூரில் செயல்படும் தேசிய வேளாண் பூச்சியியல் மூலாதார ஆய்வகத்தின் முதன்மை விஞ்ஞானி மோகன், கிருஷ்ணகிரியை அடுத்த எலுமிச்சங்கிரி வேளாண் அறிவியல் மையத் தலைவா் டி.சுந்தர்ராஜ், பையூா் மண்டல ஆராய்ச்சி நிலைய பூச்சியியல் துறை உதவி பேராசிரியா் கோவிந்தன், கிருஷ்ணகிரி தோட்டக்கலை இணை இயக்குநா் உமாராணி, துணை இயக்குநா் ராம்பிரசாத் ஆகியோா் காவேரிப்பட்டணத்தை அடுத்த என்.தட்டக்கல் கிராமத்தில் புழுக்களால் பாதிக்கப்பட்ட மா பயிா்களையும், மாங்காய்களையும் நேரில் பாா்வையிட்டு ஆய்வு செய்தனா்.

பின்னா் கிருஷ்ணகிரி மாவட்ட தோட்டக்கலை இணை இயக்குநா் உமாராணி நிருபா்களிடம் கூறியதாவது:

போச்சம்பள்ளி மற்றும் அதைச் சுற்றியுள்ள பகுதியில் 428 ஏக்கா் பரப்பளவில் மா சாகுபடி செய்யப்பட்டுள்ளன. என்.தட்டக்கல் கிராமத்தில் உள்ள மாந்தோப்புகளில் ஒரு புதிய வகைப் புழுக்கள் உருவாகி உள்ளன. தொடா்ந்து விவசாயிகள் மருந்து தெளித்து வருவதால் இவை உருவாகி இருக்கலாம். இதற்கு முதலுதவியாக இரண்டு மருந்துகளை வேளாண் விஞ்ஞானிகள் பரிந்துரைத்துள்ளனா்.

புழுக்களை அழிக்கும் முறை

அதில், புளுபெண்டமைடு ஒரு லிட்டருக்கு 5 மி.லி., வீதம் கலந்து 15 நாள்களுக்கு ஒரு முறை வீதம் இரண்டு முறை தெளிக்க வேண்டும். அல்லது டெல்டாமெத்ரின் ஒரு லிட்டருக்கு 1 மி.லி. கலந்து 15 நாள்களுக்கு ஒரு முறை வீதம் இரண்டு முறை தெளிக்க வேண்டும். இவற்றை தெளிப்பதன் மூலம் இந்தப் புழுக்கள் அழிவதற்கான வாய்ப்புகள் உள்ளது. இவ்வாறு அவா் கூறினாா்.

பையூா் மண்டல ஆராய்ச்சி நிலைய பூச்சியல் துறை உதவி பேராசிரியா் கோவிந்தன் கூறுகையில், இந்த புழுக்கள் புதிய வகையாக உள்ளதால், பரிசோதனைக்காக கோவைக்கு அனுப்பி வைக்கப்பட உள்ளது என்றாா்.

மா பயிரைத் தாக்கியுள்ள புது வகையான புழுக்கள், பாதிக்கப்பட்ட மாங்காய்கள் ஆகியவற்றை விஞ்ஞானிகள் சேகரித்து, தில்லிக்கு ஆய்வுக்காக அனுப்பி வைத்துள்ளனா். இந்த வகையான புழுக்கள் ஆந்திரம், குஜராத் மாநிலங்களில் பரவலாகக் காணப்படும். இந்த வகை புழுக்களின் தாக்குதலால் விவசாயிகள் அச்சப்படத் தேவையில்லை என தோட்டக்கலை துறையினா் தெரிவித்தனா்.

இது குறித்து பாதிக்கப்பட்ட விவசாயிகள் கூறுகையில், இந்தப் புழுக்கள் குறித்து ஆராய்ச்சி மேற்கொண்டு புதிய வகை மருந்துகள் வருவதற்குள் சாகுபடி முடிந்து விடும். ஏற்கெனவே, ஒரு ஏக்கருக்கு ரூ. 40 ஆயிரம் முதல் 50 ஆயிரம் வரையிலும் செலவு செய்துள்ளோம். தற்போது பரிந்துரைத்துள்ள மருந்தின் விலை மிகவும் அதிகம். அவற்றை வாங்கி பயன்படுத்தினால் மாங்காய்கள் முற்றிலும் அழுகி விடும் வாய்ப்புள்ளது என்று தெரிவித்தனா்.

எனவே, மாவட்ட நிா்வாகம் அரசுக்கு பரிந்துரை செய்து, மருந்துகளை மானிய விலையில் விவசாயிகளுக்கு வழங்க உடனே நடவடிக்கை எடுக்க வேண்டும். மேலும் இந்த புழுக்களால் பாதிக்கப்பட்ட விவசாயிகளுக்கு இழப்பீடு வழங்க வேண்டும் என்றனா்.