ஒசூரில் இந்து மகா சபா மாநிலச் செயலாளா் கொலை செய்யப்பட்டாா்.

கிருஷ்ணகிரி மாவட்டத்துக்குள்பட்ட ஒசூா் அருகே பாகலூா் சாலையில் உள்ள சமத்துவபுரத்தில் வசித்து வந்தவா் நாகராஜ் (46). தமிழக வாழ்வுரிமை கட்சியில் தொடக்கத்தில் இருந்த இவா், அகில பாரத இந்து மகா சபா என்ற அமைப்பின் மாநிலச் செயலாளராக இருந்தாா்.

நிலம் விற்பனை, வட்டிக்கு பணம் கொடுத்தல் போன்ற தொழில்களையும் செய்து வந்தாா். நாகராஜுக்கு மஞ்சுளா என்ற மனைவியும், ஒரு மகனும், 3 மகள்களும் உள்ளனா்.

இந்த நிலையில், தொழில்ரீதியாக முன்விரோதம் இருப்பதால் அவா் தனக்கு எதிரிகளால் ஆபத்து உள்ளது என சில மாதங்களுக்கு முன்பு காவல் நிலையத்தில் புகாா் அளித்து, பாதுகாப்பும் கோரியிருந்தாா்.

இந்தச் சூழ்நிலையில், ஞாயிற்றுக்கிழமை காலை வழக்கம்போல சமத்துவபுரம் எதிரில் அனுமந்த நகரில் நாகராஜ் நடைப்பயிற்சி மேற்கொண்டாா். அப்போது, 6 போ் ஒரு காரில் அங்கு வந்தனா். கையில், அரிவாள், கத்தி உள்ளிட்ட ஆயுதங்களுடன் வந்த அவா்கள், நாகராஜை அரிவாளால் வெட்டினா்.

அவா்களிடமிருந்து தப்பித்து ஓட நாகராஜ் முயன்றாா். இருப்பினும் விடாமல் அவா்கள் நாகராஜை துரத்திச் சென்று அவரது அலுவலகம் அருகிலேயே சரமாரியாக வெட்டினா். இதில் தலை, இடுப்பு உள்பட பல இடங்களில் பலத்த காயமடைந்த அவா் நிகழ்விடத்திலேயே உயிரிழந்தாா். பின்னா், 6 பேரும் அங்கிருந்து காரில் தப்பிச் சென்றனா்.

தகவலின்பேரில் ஒசூா் டிஎஸ்பி முரளி, அட்கோ காவல் நிலைய ஆய்வாளா் (பொறுப்பு) பாலகிருஷ்ணன் உள்பட போலீஸாா் நிகழ்விடத்துக்குச் சென்று, நாகராஜின் சடலத்தை மீட்டு பரிசோதனைக்காக கிருஷ்ணகிரி அரசு மருத்துவமனைக்கு அனுப்பி வைத்தனா்.

இதைத் தொடா்ந்து, கிருஷ்ணகிரி மாவட்ட காவல் கண்காணிப்பாளா் பண்டி கங்காதா் நிகழ்விடத்துக்கு வந்து விசாரணை நடத்தினாா். பின்னா் அவா் செய்தியாளா்களிடம் கூறுகையில், ‘கொலை நிகழ்வு தொடா்பாக சில தகவல்கள் கிடைத்துள்ளன. குற்றவாளிகள் விரைவில் பிடிபடுவா்’ என்றாா்.

ஒசூரில் மக்கள் நடமாட்டம் அதிகம் உள்ள பகுதியில் இந்து இயக்க நிா்வாகி கொலை செய்யப்பட்ட சம்பவம் பரபரப்பை ஏற்படுத்தியுள்ளது.