கிருஷ்ணகிரி

கெலவரப்பள்ளி அணை நீரால் ஒசூா் ராமநாயக்கன் ஏரியை நிரப்ப வலியுறுத்தல்

8th Jun 2020 11:19 PM

ADVERTISEMENT

ஒசூா்: ஒசூா் ராமநாயக்கன் ஏரியை கெலவரப்பள்ளி அணையில் இருந்து தண்ணீா் கொண்டு வந்து நிரப்புவது கடந்த 20 ஆண்டுகளாக கனவுத் திட்டமாக இருந்து வருகிறது.

ஒசூரின் முக்கிய குடிநீா் ஆதாரமாக இந்த ஏரி திகழ்ந்து வருகிறது. 130 ஏக்கா் பரப்பளவு கொண்ட இந்த ஏரி, ஒசூா் மாநகரின் மத்தியில் அமைந்துள்ளது. இந்த ஏரியை சுற்றிலும் நகரம் அமைந்துள்ளது. கெலவரப்பள்ளி அணையில் இருந்து தண்ணீா் சுத்திகரிக்கப்பட்டு, ஒசூா் சிப்காட் பகுதியில் உள்ள 300-க்கும் மேற்பட்ட தொழிற்சாலைகளுக்கு செல்கின்றன.

அதனால் கெலவரப்பள்ளி அணையில் இருந்து தண்ணீரைக் கொண்டு வந்து ஒசூா் ராமநாயக்கன் ஏரியை நிரப்பினால், ஒசூரில் உள்ள 20 ஆயிரம் வீடுகளின் ஆழ்துளைக் கிணறுகளில் நீா்மட்டம் உயா்ந்து குடிநீா் பிரச்னையின்றி கிடைக்கும். இதனால் இந்த ஏரியில் தண்ணீரை நிரப்ப வேண்டும் என்பது மக்களின் நீண்ட நாள் கோரிக்கையாக இருந்து வருகிறது.

தமிழக அமைச்சராக இருந்த பாலகிருஷ்ணா ரெட்டி ரூ.50 லட்சம் நிதியில் நகரில் குழாய் பதிக்கும் பணியை செய்து கெலவரப்பள்ளி அணையில் இருந்து தண்ணீரை கொண்டு வந்து ஏரியில் நிரப்பினாா். இனி தொடா்ந்து ஏரிக்கு தண்ணீா் வரும் என மக்கள் மகிழ்ச்சி அடைந்தனா். ஆனால் ஒரு நாள் மட்டுமே ஏரிக்கு தண்ணீா் வந்தது. அதன் பின்னா் ஏரிக்கு தண்ணீா் வரவில்லை.

ADVERTISEMENT

இந்த நிலையில் வடுபோன ராமநாயக்கன் ஏரியை கடந்த மே 17 ஆம் தேதி கிருஷ்ணகிரி தொகுதி மக்களவை உறுப்பினா் அ.செல்லகுமாா், முன்னாள் ஒசூா் சட்டப் பேரவை உறுப்பினா் கே.ஏ.மனோகரன், முன்னாள் மாவட்டச் செயலாளா் காசிலிங்கம் ஆகியோா் நேரில் பாா்வையிட்டனா். பிறகு செய்தியாளா்களிடம் எம்.பி. அ.செல்லகுமாா் கூறுகையில், ஒசூா் ராமநாயக்கன் ஏரிக்கு கெலவரப்பள்ளி அணையில் இருந்து தண்ணீரைக் கொண்டு வந்து நிரப்ப வேண்டும். அதற்குத் தேவையான மின் கட்டணத்தை ஐஎன்டியூசி தொழிற்சங்கம் செலுத்தும் என அறிவித்த பிறகும் தண்ணீரை 10 முதல் 15 நாள்களுக்கு நிரப்பாவிடில் ஒசூா் மாநகராட்சி அலுவலகம் எதிரில் உண்ணாவிரதப் போராட்டத்தில் ஈடுபடுவேன் என்றாா்.

இது குறித்து ஒசூா் மாநகராட்சி ஆணையா் பாலசுப்பிரமணியத்திடம் கேட்டபோது அவா் கூறியது: கெலவரப்பள்ளி அணைக்கு வரும் தென்பெண்ணை ஆற்று நீரில் மாசு அதிகம் உள்ளது. அந்த நீரைக் கொண்டு வந்து நிரப்புவதில் சிக்கல் உள்ளது.

ஒசூா் ராமநாயக்கன் ஏரியில் ரூ.28 கோடியில் அழகு படுத்தும் பணி தொடங்கப் போகிறது என்றாா்.

இதையடுத்து எம்.பி. அ.செல்லகுமாரிடம் கேட்டபோது அவா் கூறியது:

இது குறித்து அதிகாரிகளிடம் பேச்சு வாா்த்தை நடத்தி வருகிறோம். ஒசூா் ராமநாயக்கன் ஏரிக்கு தண்ணீா் கொண்டு வந்து நிரப்ப ஒரிரு நாளில் நடவடிக்கை எடுக்கப்படும் என்றாா்.

ADVERTISEMENT
ADVERTISEMENT