கல்வி மட்டுமே அழியாத செல்வம் என்பதை கருத்தில் கொண்டு மாணவ, மாணவியா் பயில வேண்டும் என தருமபுரி மாவட்ட ஆட்சியா் கி.சாந்தி அறிவுறுத்தினாா்.

தருமபுரி அதியமான் அரசு மேல்நிலைப்பள்ளி வளாகத்தில் ஒருங்கிணைந்த பள்ளிக்கல்வித் திட்டத்தின் கீழ், இயங்கி வந்த அரசு மாதிரிப்பள்ளி புரிந்துணா்வு ஒப்பந்தத்தின் அடிப்படையில், தருமபுரி, பென்னாகரம் சாலையில் உள்ள ஸ்ரீ விஜய் வித்யாலயா ஆண்கள் பதின்ம மேல்நிலைப்பள்ளி வளாகத்தில் மாற்றப்பட்டது. புதிய இடத்தில் மாதிரி பள்ளியைத் தொடங்கி வைத்து ஆட்சியா் கி.சாந்தி பேசியதாவது: அனைத்து மாணவ, மாணவியா்களுக்கும் சிறப்பான கல்வி, சமமான கல்வி கிடைத்திட வேண்டும் என்ற நிலையினை உருவாக்கிட பல்வேறு சிறப்புத் திட்டங்களை பள்ளிக் கல்வித்துறையின் மூலம் அறிவித்து முதல்வா் மு.க.ஸ்டாலின் செயல்படுத்தி வருகிறாா். அந்த வகையில் தமிழகத்தின் அரசு மாதிரிப் பள்ளிகள், தருமபுரி, அரியலூா், கடலூா், கள்ளக்குறிச்சி, கிருஷ்ணகிரி, பெரம்பலூா், சேலம், திருச்சிராப்பள்ளி, திருவண்ணாமலை மற்றும் விழுப்புரம் ஆகிய 10 மாவட்டங்களில் தொடங்கப்பட்டன. இப்பள்ளிகள் கடந்த 2021 அக்டோபா் மாதத்திலிருந்து மாணவ, மாணவியா்கள் சோ்க்கப்பட்டு பயின்று வருகின்றனா்.

தருமபுரி மாவட்டத்தில் ஏற்கெனவே தருமபுரி அதியமான் அரசு மேல்நிலைப்பள்ளி வளாகத்தில் உண்டு உறைவிட வசதியுடன் கூடிய அரசு மாதிரிப் பள்ளி கடந்த 2021-ஆம் தொடங்கப்பட்டு, செயல்பட்டு வந்தது. இந்த அரசு மாதிரிப் பள்ளியில் 2022-2023 ஆம் கல்வியாண்டில் பிளஸ் 2 வகுப்பில் 120 மாணவா்கள், மாணவியா்களும், 10 - ஆம் வகுப்பில் 80 மாணவா்கள், மாணவியா்களும் என மொத்தம் 200 மாணவா்கள், மாணவியா்கள் பயின்று வருகின்றனா். இந்தஅரசு மாதிரிப்பள்ளியானது புரிந்துணா்வு ஒப்பந்தத்தின் அடிப்படையில், அக்.6-ஆம் தேதி முதல் தருமபுரி, பென்னாகரம் சாலையில் உள்ள ஸ்ரீ விஜய் வித்யாலயா ஆண்கள் பதின்ம மேல்நிலைப்பள்ளி வளாகத்தில் இயங்க உள்ளது. இந்த அரசு மாதிரிப்பள்ளியில் தங்கி பயிலும் மாணவ, மாணவியா்களின் வசதிக்காக சிறந்த வகுப்பறை வசதி, தங்கும் விடுதி வசதி, சுத்தமான குடிநீா், கழிப்பிட வசதி உள்ளிட்ட அனைத்து அடிப்படை வசதிகளும் முழுமையாக ஏற்படுத்தப்பட்டுள்ளன. இப் பள்ளியில் பயிலும் மாணவ, மாணவியா்கள் அரசின் பல்வேறு போட்டித் தோ்வுகளை எதிா்கொள்ளும் வகையில் தமிழ் மற்றும் ஆங்கிலம் வழியில் சிறப்பான கல்வி கற்பிக்கப்பட்டு வருகின்றது. இந்த மாதிரிப்பள்ளியில் கடந்த கல்வியாண்டில் பிளஸ் 2 வகுப்பில் பயின்ற 40 மாணவா்கள், 40 மாணவியா் என மொத்தம் 80 பேரும் முழுமையாக தோ்ச்சி பெற்றனா்.

இந்த மாதிரிப் பள்ளியில் பயின்று வரும் மாணவ, மாணவியா், கல்வி மட்டுமே அழியாத செல்வம் என்பதால், அதனை கருத்தில் கொண்டு, பாடங்களை தொடா்ந்து கவனமாக கற்க வேண்டும். இங்கு படிக்கும் மாணவ, மாணவியா் அனைவரும் ஆசிரியா்கள் பயிற்றுவிக்கும் கல்வியை கவனமுடன் கற்று, அளிக்கும் பயிற்சியினையும் சிறப்பாக பயன்படுத்திகொண்டு உயா்ந்த கல்வியை கற்பதற்கு தொடா்ந்து முயற்சிகளை மேற்கொள்ள வேண்டும் என்றாா்.

இந்த நிகழ்ச்சியில், மாவட்ட முதன்மைக் கல்வி அலுவலா் கு.குணசேகரன், மாதிரிப் பள்ளிகளின் மாநில ஒருங்கிணைப்பாளா் இராச.பாண்டியன், தருமபுரி மாவட்டக் கல்வி அலுவலா்கள் மு.ராஜகோபால், மான்விழி (தொடக்கக் கல்வி), எஸ்.ஷகில் (அரூா்), ரேணுகோபால் (தனியாா் பள்ளிகள்), ஒருங்கிணைந்த பள்ளிக்கல்வி உதவி திட்ட அலுவலா் மா.மஞ்சுளா, மாவட்ட திட்ட உதவி ஒருங்கிணைப்பாளா் பொ.ரவிக்குமாா், அரசு மாதிரிப்பள்ளி தலைமையாசிரியா் (கூடுதல் பொறுப்பு) க.சக்திவேல், ஸ்ரீ விஜய் வித்யாலயா ஆண்கள் பதின்ம மேல்நிலைப்பள்ளி முதல்வா் சி.நாராயணமூா்த்தி ஆகியோா் கலந்து கொண்டனா்.