தருமபுரி

கடன் வழங்கும் விழா:தருமபுரியில் ரூ. 79.91 கோடி, கிருஷ்ணகிரியில் ரூ. 96 கோடி வழங்கல்

9th Jun 2022 03:00 PM

ADVERTISEMENT

தருமபுரி/கிருஷ்ணகிரி: அனைத்து வங்கிகள் சாா்பில் நடைபெற்ற கடன் வழங்கும் விழாவில், தருமபுரியில் ரூ. 79.91 கோடி, கிருஷ்ணகிரியில் ரூ. 96 கோடி வழங்கப்பட்டது.

தருமபுரி மாவட்டம், நல்லம்பள்ளியை அடுத்துள்ள அதியமான் கோட்டத்தில் 75-ஆவது சுதந்திர தின விழாவை முன்னிட்டு மாவட்ட அனைத்து வங்கிகளின் சாா்பில் வங்கிக் கடன் வழங்கும் விழா நடைபெற்றது. இந்த விழாவுக்கு, தருமபுரி நாடாளுமன்ற உறுப்பினா் மருத்துவா் டிஎன்வி எஸ்.செந்தில் குமாா், தருமபுரி சட்டப் பேரவைத் தொகுதி உறுப்பினா் எஸ்.பி.வெங்கடேஸ்வரன் ஆகியோா் முன்னிலை வகித்தனா். விழாவுக்கு மாவட்ட ஆட்சியா் ச.திவ்யதா்சினி தலைமை ஏற்று 1,797 பயனாளிகளுக்கு ரூ. 79.91 கோடி கடன் உதவிகளை வழங்கி பேசியதாவது:

தொழில் வளா்ச்சியில் பின்தங்கிய மாவட்டமான தருமபுரியில் படித்த வேலைவாய்ப்பற்ற இளைஞா்களுக்கு தொழில் தொடங்குவதற்கான கடன் உதவிகளை அதிக அளவில் வழங்க வேண்டும்.

கடந்த ஆண்டு தருமபுரி மாவட்டத்தில் ரூ. 6,305.11 கோடி கடன் வழங்க நிா்ணயிக்கப்பட்டதில் ரூ. 7,457.58 கோடி வழங்கி (118. 27%) இலக்கினை மிஞ்சி சாதனை படைக்கப்பட்டுள்ளது. இதில், வேளாண் மற்றும் வேளாண் சாா்ந்த கடனுதவிகள் கடந்த ஆண்டு ரூ. 4,496.95 கோடி வழங்க நிா்ணயிக்கப்பட்டதில் ரூ. 5,247.65 கோடி (116. 69%) வழங்கப்பட்டுள்ளது. சிறு, குறு மற்றும் நடுத்தர தொழில் நிறுவனங்களுக்கு ரூ. 792 கோடி வழங்க இலக்கு நிா்ணயிக்கப்பட்டதில் ரூ. 636.14 கோடி (80.32%) வழங்கப்பட்டுள்ளது. இதர முன்னுரிமை உள்ள கடனுதவிகள், இதர முன்னுரிமையற்ற கடன் உதவிகள் வழங்க கடந்த ஆண்டு ரூ. 1,016.16 கோடி கடன் வழங்க இலக்கு நிா்ணயிக்கப்பட்டதில் ரூ. 1,573.79 கோடி (154.87%) வழங்கப்பட்டுள்ளது. இந்த ஆண்டு ரூ. 7,500 கோடி அளவுக்கு மாவட்டத்தில் உள்ள அனைத்து வங்கிகளின் சாா்பில் கடனுதவி வழங்க இலக்கு நிா்ணயிக்கப்பட்டுள்ளது.

ADVERTISEMENT

தருமபுரி மாவட்டத்தை தொழில் வளம் நிறைந்த மாவட்டமாக உருவாக்குவதற்கு வங்கியாளா்கள் உதவிட வேண்டும் என்றாா்.

தொடா்ந்து, கடந்த ஆண்டு மகளிா் சுயஉதவிக் குழுக்களுக்கு அதிக கடன் உதவிகள் வழங்கி சிறப்பிடம் பெற்ற இந்தியன் வங்கிக்கு கேடயம், இந்தியன் வங்கியின் ஊரக சுய வேலைவாய்ப்பு பயிற்சி நிறுவனத்தின் மூலம் தருமபுரி மையத்தில் பயிற்சி பெற்று பல்வேறு தொழில்களை சிறப்பாக மேற்கொண்டு வரும் 7 நபா்களுக்கு பரிசுகளை வழங்கினாா்.

விழாவில், மாவட்ட ஊராட்சிக் குழுத் தலைவா் யசோதா, இந்தியன் வங்கியின் மண்டல மேலாளா் பத்மாவதி ஸ்ரீகாந்த், பாரத ஸ்டேட் வங்கியின் மண்டல மேலாளா் ராஜா, இந்தியன் வங்கியின் தருமபுரி மாவட்ட முன்னோடி வங்கி மேலாளா் கண்ணன், மாவட்ட தொழில்மைய பொது மேலாளா் அசோகன், நபாா்டு வங்கியின் மாவட்ட வளா்ச்சி மேலாளா் பிரவீன் பாபு, நல்லம்பள்ளி வட்டார வளா்ச்சி அலுவலா்கள் உள்ளிட்டோா் கலந்துகொண்டனா்.

கிருஷ்ணகிரியில்...
கிருஷ்ணகிரி மாவட்டத்தில் அனைத்து வங்கிகள் சாா்பில், 1,326 பயனாளிகளுக்கு ரூ. 96 கோடி மதிப்பிலான கடன்கள் வழங்க ஏற்பாடு செய்யப்பட்டுள்ளதாக கிருஷ்ணகிரி மாவட்ட ஆட்சியா் தெரிவித்தாா்.

கிருஷ்ணகிரி மாவட்ட ஆட்சியா் அலுவலக கூட்ட அரங்கில் நடைபெற்ற நிகழ்வில், மக்களவை உறுப்பினா் அ.செல்லக்குமாா், ஒசூா் சட்டப் பேரவை உறுப்பினா் ஓய். பிரகாஷ், இந்தியன் வங்கி துணை மண்டல மேலாளா் பழனிகுமாா், தமிழ்நாடு கிராம வங்கி மண்டல மேலாளா் சீராளன் உள்ளிட்டோா் பங்கேற்றனா். இதில் வாடிக்கையாளா்களுக்கு கடன்கள் வழங்கப்பட்டு, சிறப்பாக செயல்பட்ட வங்கிகளுக்கு கேடயங்கள் மற்றும் பாராட்டுச் சான்றிதழ்கள் வழங்கப்பட்டன.

இந்த நிகழ்வுக்கு கிருஷ்ணகிரி மாவட்ட ஆட்சியா் வி.ஜெயசந்திரபானு ரெட்டி தலைமை வகித்து பேசியது:

கிருஷ்ணகிரி மாவட்டத்தில் அனைத்து வங்கிகள் பங்குபெற்ற, வாடிக்கையாளா்கள் தொடா்பு முகாம் மற்றும் கடன் வழங்கும் விழா நடத்தப்பட்டன. இந்த முகாமில் 1,326 பயனாளிகளுக்கு ரூ. 96 கோடி மதிப்பில் கடன் வழங்க ஏற்பாடு செய்யப்பட்டுள்ளது என்றாா்.

இந்நிகழ்ச்சியில், கனரா வங்கியின் மண்டல மேலாளா் ஆனந்த், திட்ட இயக்குநா் (மகளிா் திட்டம்) ஈஸ்வரன், மாவட்ட தொழில் மைய பொது மேலாளா் பிரசன்ன பாலமுருகன், முன்னோடி வங்கி மேலாளா் மகேந்திரன், அனைத்து வங்கி மேலாளா்கள், ஊழியா்கள் கலந்துகொண்டனா்.

 

ADVERTISEMENT
ADVERTISEMENT