பென்னாகரம் மற்றும் அதன் சுற்றுவட்டாரப் பகுதிகளில் புகையிலைப் பொருள்கள் விற்பனை செய்வதைத் தடுக்க வேண்டும் என கோரிக்கை எழுந்துள்ளது.

தருமபுரி மாவட்டம், பென்னாகரம் பகுதியில் 10,000க்கும் மேற்பட்டவா்கள் வசித்து வருகின்றனா். பென்னாகரம் கடை வீதி, நாகமரை நான்கு சாலை சந்திப்பு, இந்திரா நகா், கிருஷ்ணாபுரம், முள்ளுவாடி உள்ளிட்ட பகுதிகளில் உள்ள கடைகளில் அரசால் தடை செய்யப்பட்ட புகையிலை பொருள்களான ஹான்ஸ், குட்கா உள்ளிட்டவை அதிக அளவில் விற்பனை செய்யப்படுகின்றன.

இரவு நேர ஊரடங்கு மற்றும் முழு பொது முடக்கத்தின்போது அதிக விலைக்கு விற்பனை செய்கின்றனா். சில சமயங்களில் மாணவா்களுக்கும் விற்பனை செய்வதாக புகாா் தெரிவிக்கின்றனா்.

இதேபோல் பாப்பாரப்பட்டி, ஏரியூா், பெரும்பாலை, ஒகேனக்கல் உள்ளிட்ட பகுதிகளிலும் அதிக அளவில் விற்பனை செய்யப்படுவதாகவும் தொடா் புகாா் எழுந்துள்ளது. எனவே பென்னாகரம் பகுதிகளில் புகையிலை பொருள்கள் விற்பனை செய்வதை முழுமையாகத் தடுக்க வேண்டும் எனவும், விற்பனை செய்வோா் மீது கடும் நடவடிக்கை எடுக்க வேண்டும் என சமூக ஆா்வலா்கள் கோரிக்கை விடுத்துள்ளனா்.