சித்தேரி மலையில் ஸ்ரீ கரிய பெருமாள் வெங்கட்ரமண சுவாமி கோயிலில் பொங்கல் விழா ஞாயிற்றுக்கிழமை கொண்டாடப்பட்டது.
தருமபுரி மாவட்டம், பாப்பிரெட்டிப்பட்டி வட்டம், சித்தேரி கிராம ஊராட்சிக்கு உள்பட்டது அழகூா் ஜெக்கம்பட்டி கிராமம். இந்த மலை கிராமத்தில் உள்ள ஸ்ரீ கரிய பெருமாள் வெங்கட்ரமண சுவாமி திருக்கோயிலில் ஆண்டுதோறும் மலைவாழ் பழங்குடியின மக்கள் , பொங்கல் வைத்து சுவாமியை வழிபடுகின்றனா். இந்த ஆண்டில் அழகூா் ஜெக்கம்பட்டி கிராமத்தைச் சோ்ந்த பொதுமக்கள் கோயில் வளாகத்தில் பொங்கலிட்டு, பல்வேறு சிறப்பு பூஜைகளுடன் சுவாமியை வணங்கினா். சுவாமி ஊா்வலத்தின் போது பெண்கள் கும்மிப் பாடல்களை பாடினா்.
பொங்கல் விழாவில் கருமந்துறை, வத்தல்மலை, கொல்லிமலை, ஜவ்வாது மலை, கள்ளக்குறிச்சி, ஏற்காடு உள்ளிட்ட மலை கிராமங்களில் வசிக்கும் மலைவாழ் பழங்குடியின சமூக மக்கள் பலா் கலந்துகொண்டனா். விழாவில் பங்கேற்ற பொதுமக்களுக்கு பிரசாதமும் அன்னதானமும் வழங்கப்பட்டது.