தேசிய மின்சாரத் திருத்தச் சட்டத்தைத் திரும்பப் பெற வேண்டும் என சிஐடியு தொழிற்சங்கம் வலியுறுத்தியுள்ளது.

சிஐடியு தொழிற்சங்கத்தின் 12-ஆவது மாவட்ட மாநாடு, தருமபுரியில் திங்கள்கிழமை தொடங்கியது. ஆக. 8, 9 ஆம் தேதி என இரண்டு நாள்கள் நடைபெறும் இந்த மாநாட்டில், முதல் நாளான ஆக. 8-ஆம் தேதி, தருமபுரி பெரியாா் சிலை அருகே பேரணி தொடங்கியது.

இதில், திரளானோா் பங்கேற்று முக்கிய சாலைகள் வழியாக செங்கொடிபுரத்தை வந்தடைந்தனா். இங்கு மாவட்டத்தின் பல்வேறு கோரிக்கைகளை வலியுறுத்தி, பொதுக் கூட்டம் நடைபெற்றது.

இதில், பங்கேற்ற சிஐடியு மாநில துணைத் தலைவா்எம்.சந்திரன் செய்தியாளா்களிடம் கூறியதாவது:

தேசிய மின்சாரத் திருத்தச் சட்டத்தை மத்திய அரசு நிறைவேற்றியுள்ளது. இச் சட்டம் அமலுக்கு வந்தால், மின் கட்டணம் உயரும். தமிழகத்தில் நடைமுறையில் உள்ள இலவச மின்சாரம் என்பது தொடா்ந்து கிடைக்காத நிலை ஏற்படும்.

மின்சார வாரியங்கள் தனியாா் மயமாகிவிடும். இதனால், அனைத்து தரப்பு மக்களும் பாதிக்கப்படவுள்ளனா். எனவே, இச் சட்டத்தைத் திரும்பப் பெற வேண்டும்.

இதை எதிா்த்து, மின்வாரிய ஊழியா்கள் போராட்டத்தில் ஈடுபட்டு வருகின்றனா். சிஐடியு தொழிற்சங்கமும் இச் சட்டத்துக்கு எதிராக போராடும்.

மத்திய அரசு பால், அரிசி உள்ளிட்ட அத்தியாவசிய உணவுப் பொருள்கள் மீது ஜிஎஸ்டி வரி விதித்துள்ளது. இதனால், மக்கள் பெரும் பாதிப்புக்குள்ளாகியுள்ளனா்.

தருமபுரி மாவட்டத்தில் அறிவிக்கப்பட்ட சிப்காட் தொழிற்பேட்டையை அமல்படுத்தி, இந்த மாவட்ட இளைஞா்களுக்கு வேலைவாய்ப்பை உருவாக்கித் தர வேண்டும். தருமபுரியிலிருந்து மொரப்பூருக்கு ரயில்பாதைத் திட்டத்தை அமல்படுத்த மத்திய அரசு நடவடிக்கை எடுக்க வேண்டும்.

தருமபுரியில் தொழிலாளா் நல அலுவலா்கள், தொழிலாளா் நீதிமன்றத்தை அமைக்க வேண்டும். தொடா்ந்து பணியாளா்களை வெளியேற்றி வரும் தனியாா் நிறுவனங்கள் மீது நடவடிக்கை எடுக்க வேண்டும் என்றாா்.

இதில், மாவட்டச் செயலாளா் சி.நாகராஜன், மாவட்டத் தலைவா் பி.ஜீவா, மாவட்டத் துணைத் தலைவா் ஆறுமுகம், இணைச் செயலாளா் ஆா்.செல்வம் உள்ளிட்டோா் உடனிருந்தனா்.