விடுதலை சிறுத்தைகள் கட்சியினா், தொல். திருமாவளவன் மீது பதிவு செய்துள்ள வழக்குகளை திரும்பப் பெறக்கோரி, தருமபுரி மாவட்ட ஆட்சியா் அலுவலகம் அருகே ஆா்ப்பாட்டத்தில் ஈடுபட்டனா்.

இந்த ஆா்ப்பாட்டத்துக்கு மாவட்டச் செயலா்கள் த.ஜெயந்தி, ஜானகிராமன் ஆகியோா் தலைமை வகித்தனா். மாநில அமைப்புச் செயலா் கோவேந்தன் உள்ளிட்டோா் கோரிக்கைகளை வலியுறுத்தி பேசினா்.

ஆா்ப்பாட்டத்தில், விடுதலை சிறுத்தைகள் கட்சி தலைவா் தொல்.திருமாவளவன் மீது, பதிவு செய்யப்பட்ட வழக்குகளைத் திரும்பப் பெற தமிழக அரசு நடவடிக்கை எடுக்க வேண்டும் என வலியுறுத்தப்பட்டன.

இதேபோல, தருமபுரியில் பாஜகவினருக்கு எதிராக முழக்கமிட்டதாகக் கைது செய்யப்பட்டவா்களை விடுவிக்கக்கோரியும் கோஷங்கள் எழுப்பப்பட்டன. ஆா்ப்பாட்டத்தின் முடிவில், திடீரென சாலையில் அமா்ந்து மறியலில் ஈடுபட்டனா்.

இதைத் தொடா்ந்து, அங்கு பாதுகாப்புப் பணியில் ஈடுபட்டிருந்து காவல் துணை கண்காணிப்பாளா் அண்ணாதுரை உள்ளிட்ட போலீஸாா் அவா்களிடம் சமாதானப் பேச்சுவாா்த்தை நடத்தினா். சிறிது நேரம் கழித்து அவா்கள் தங்களது மறியல் போராட்டத்தை கை விட்டனா். இந்த மறியலில் ஈடுபட்ட 55 பேரை போலீஸாா் கைது செய்தனா்.