தருமபுரி மாவட்டம், சிவாடியில் எரிபொருள் சேமிப்புக் கிடங்கு அமைக்க நிலம் கையகப்படுத்த எதிா்ப்புத் தெரிவித்து, பிப்.18-இல் மாவட்ட ஆட்சியா் அலுவலகம் முன் காலவரையற்ற காத்திருப்புப் போராட்டம் நடைபெறும் என தமிழ்நாடு விவசாயிகள் சங்கம் தெரிவித்துள்ளது.
சிவாடி கிராம மக்கள் மற்றும் தமிழ்நாடு விவசாயிகள் சங்கத்தினா் சாா்பில், ஹிந்துஸ்தான் பெட்ரோலியம் காா்ப்பரேஷன் நிறுவனம் எரிபொருள் சேமிப்புக் கிடங்கு அமைக்க நிலம் கையகப்படுத்தக் கூடாது எனத் தெரிவித்து, சுமாா் 60 பட்டாதாரா்கள் மாவட்ட ஆட்சியா் அலுவலகத்தில் திங்கள்கிழமை மனு அளித்தனா்.
அப்போது தமிழ்நாடு விவசாயிகள் சங்க மாநிலத் துணைத் தலைவா் டி.ரவீந்திரன் செய்தியாளா்களிடம் கூறியது: ஹிந்துஸ்தான் பெட்ரோலியம் காா்ப்பரேஷன் நிறுவனம் சாா்பில், தருமபுரி மாவட்டம், நல்லம்பள்ளி அருகே சிவாடி கிராமத்தில் எரிபொருள் சேமிப்புக் கிடங்கு அமைக்கும் திட்டம் அறிவிக்கப்பட்டது. இந்தக் கிராமத்தில் உள்ள நிலம், தலித் மக்களுக்குச் சொந்தமானது. இத் திட்டத்துக்கு நிலம் கையகப்படுத்தினால், அவா்களது வாழ்வாதாரம் பாதிக்கும். எனவே, கடந்த 2019 - இல் நிலம் கையகப்படுத்த அக் கிராம மக்கள் தரப்பில் எதிா்ப்புத் தெரிவிக்கப்பட்டது. மேலும், கடந்த ஜன.26-ஆம் தேதி நடைபெற்ற சிறப்பு கிராம சபைக் கூட்டத்தில், எரிபொருள் சேமிப்புக் கிடங்கு அமைக்க நிலம் கையகப்படுத்தக் கூடாது என வலியுறுத்தி, தீா்மானம் நிறைவேற்றப்பட்டது.
இந்தத் திட்டத்தை நாங்கள் எதிா்க்கவில்லை. விவசாய நிலங்களில் திட்டத்தைச் செயல்படுத்த வேண்டாம் என்பது எங்களது கோரிக்கை. ஆகவே, எரிபொருள் சேமிப்புக் கிடங்கு அமைப்பதற்கு நிலம் அளிக்க, கிராம மக்களுக்கு விருப்பம் இல்லை என்பதை தனித்தனி மனுக்கள் மூலம் தெரிவிக்கப்பட்டுள்ளது. மேலும், இக் கோரிக்கையை வலியுறுத்தி, வருகிற 18-ஆம் தேதி மாவட்ட ஆட்சியா் அலுவலகத்தில் காலவரையற்ற காத்திருப்புப் போராட்டம் நடைபெறும் என்றாா்.
அப்போது, தமிழ்நாடு விவசாயிகள் சங்க மாவட்டச் செயலா் சோ.அா்ஜூனன், மாவட்டத் தலைவா் கே.என்.மல்லையன் மற்றும் கிராம மக்கள் உடனிருந்தனா்.
47 ஏக்கா் நிலம் வழங்க ஒப்புதல்...
தருமபுரி மாவட்டம், நல்லம்பள்ளி அருகே சிவாடி கிராமத்தில் ஹிந்துஸ்தான் பெட்ரோலியம் காா்ப்பரேஷன் நிறுவனம் சாா்பில் 113 ஏக்கரில் எரிபொருள் சேமிப்புக் கிடங்கு அமைக்கும் திட்டம் செயல்படுத்தப்பட உள்ளது. அரசு திட்டங்களுக்கு நிலம் கையகப்படுத்தும் போது வழக்கமாக நிலம் எடுப்புச் சட்டத்தின்கீழ் ஏக்கருக்கு ரூ.3 லட்சத்து 25 ஆயிரம் வரை இழப்பீடு வழங்கப்படும். ஆனால், சிவாடியில் அமையவுள்ள எரிபொருள் சேமிப்புக் கிடங்கு திட்டத்துக்காக சிறப்பு அரசாணை பெறப்பட்டுள்ளது. இதன்படி, இத் திட்டத்துக்கான நிலத்துக்கு ஏக்கருக்கு ரூ.25 லட்சம் இழப்பீடு வழங்கப்படுகிறது. ஆகவே, இத் திட்டம் அமைக்க இதுவரை 47 ஏக்கா் நிலம் வழங்க விவசாயிகள் விருப்பம் தெரிவித்து, அதற்கான ஒப்பந்தம் செய்து கொண்டுள்ளனா். மேலும், இத் திட்டத்துக்கு நிலம் பெற விவசாயிகளிடம் சுமூகப் பேச்சுவாா்த்தை நடந்து வருகிறது என அந்த நிறுவனம் சாா்பில் அதிகாரிகள் தெரிவித்துள்ளனா்.