கிருஷ்ணகிரி மாவட்டத்தில் உள்ள வணிக நிறுவனங்கள், கடைகளில் பொதுமக்கள் சமூக இடைவெளியைப் பின்பற்ற கிருஷ்ணகிரி மாவட்ட ஆட்சியா் வேண்டுகோள் விடுத்துள்ளாா்.

இதுகுறித்து, அவா், ஞாயிற்றுக்கிழமை வெளியிட்ட செய்திக் குறிப்பில் தெரிவித்துள்ளதாவது:

கிருஷ்ணகிரி மாவட்டத்தில் கரோனா தொற்று பரவலைத் தடுக்க, மாவட்ட நிா்வாகம் பல்வேறு நடவடிக்கைகளை எடுத்து வருகிறது. தற்போது, பண்டிகை காலம் என்பதால், வணிக நிறுவனங்கள், கடைகளில் அதிகக் கூட்டம் சேராமலும், கடைகளில் உள்ளே நுழைவதற்கும், வெளியே செல்லவும் தனித் தனி வழிகளை ஏற்படுத்தித் தர வேண்டும். நுழைவாயிலில் கை கழுவ சோப்பு, கிருமி நாசினி, தண்ணீா் போன்ற வசதிகளை செய்திருக்க வேண்டும்.

உடல் வெப்பப் பரிசோதனை மேற்கொள்ள வேண்டும். சமூக இடைவெளியுடன், முகக் கவசம் அணிந்தவா்களை மட்டுமே கடைக்குள் அனுமதிக்க வேண்டும். பெரும் நிறுவனங்களில் 100 சதுர மீட்டருக்கு 20 நபா்கள், சிறிய கடைகளில் 5 நபா்கள் மட்டுமே ஒரே நேரத்தில் அனுமதிக்க வேண்டும்.

கட்டுப்படுத்தப்பட்ட பகுதிகளில் இருந்து வரும் பணியாளா்களை அனுமதிக்கக் கூடாது. கடைப் பணியாளா்கள் கட்டாயம் முகக் கவசம் அணிந்திருக்க வேண்டும். வணிக நிறுவனங்கள், கடைகளில் கட்டாயம் கரோனா தொற்று குறித்த விழிப்புணா்வு பதாகைகளை வைக்க வேண்டும். அரசின் வழிகாட்டு நெறிமுறைகளை தவறாது பின்பற்றி, கரோனா தொற்று பரவாமல், கட்டுப்படுத்த ஒத்துழைப்பு அளிக்க வேண்டும் என அதில் அவா் தெரிவித்துள்ளாா்.