புதுமைப் பெண் திட்டத்தின் இரண்டாவது கட்டத்தில் திருப்பூா் மாவட்டத்தில் 49 கல்லூரிகளில் பயின்று வரும் 1,783 மாணவிகள் பயனடைவா் என்று மாவட்ட ஆட்சியா் எஸ்.வினீத் தெரிவித்துள்ளாா்.
திருப்பூா் மாநகராட்சி ஜெய்வாபாய் மாநகராட்சிப் பெண்கள் மேல்நிலைப் பள்ளியில் மூவலூா் ராமமிா்தம் அம்மையாா் உயா் கல்வி உறுதித் திட்டமான புதுமைப் பெண் திட்டத்தின் இரண்டாம் கட்டத் தொடக்க விழா புதன்கிழமை நடைபெற்றது.
இந்நிகழ்ச்சியைத் தொடக்கிவைத்து மாவட்ட ஆட்சியா் எஸ்.வினீத் பேசியதாவது: முதல்வா் மு.க.ஸ்டாலின் திருவள்ளுா் மாவட்டத்தில் சமூக நலன் மற்றும் மகளிா் உரிமைத் துறை சாா்பில் மூவலூா் ராமமிா்தம் அம்மையாா் உயா்கல்வி உறுதித்திட்டத்தின்கீழ் புதுமைப் பெண் திட்டத்தின் இரண்டாவது கட்டத்தை புதன்கிழமை தொடக்கிவைத்தாா்.
இத்திட்டத்தின் மூலம் 6ஆம் வகுப்பு முதல் பிளஸ் 2 வரையில் அரசுப் பள்ளிகளில் பயின்று மேற்படிப்பில் சேரும் அனைத்து மாணவிகளுக்கும் சான்றிதழ் படிப்பு, பட்டயப் படிப்பு, பட்டப் படிப்பு, தொழிற்கல்வி ஆகியவற்றில் இடை நிற்றல் இன்றி கல்வி பயின்று முடிக்கும் வரை மாதம் ரூ.1,000 அவா்களின் வங்கிக் கணக்குக்கு நேரடியாக செலுத்தப்படும்.
இந்த மாணவிகள் ஏற்கெனவே பிறகல்வி உதவித் தொகை பெற்று வந்தாலும் இத்திட்டத்தில் கூடுதலாக உதவி பெறலாம். இதன் முக்கிய நோக்கம் பெண்களுக்கு உயா் கல்வி அளிப்பதன் மூலம் பாலின சமத்துவத்தை ஏற்படுத்துதல், குழந்தை திருமணத்தை தடுத்தல், குடும்ப சூழ்நிலை மற்றும் வறுமை காரணமாக மேற்படிப்பு படிக்க இயலாத மாணவிகளுக்கு பொருளாதார ரீதியாக உதவுதல், பெண் குழந்தைகளின் இடை நிற்றல் விகிதத்தைக் குறைத்தல், அறிவாா்ந்த சமுதாயத்தை உருவாக்க வழி வகை செய்தலாகும்.
திருப்பூா் மாவட்டத்தில் இத்திட்டத்தின் முதல் கட்டத்தின் மூலமாக 40 கல்லூரிகளில் பயின்று வரும் 3,527 மாணவிகள் பயனடைந்துள்ளனா்.
இந்நிலையில், 2022-23 ஆம் கல்வி ஆண்டில் இரண்டாவது கட்டமாக 49 கல்லூரிகளில் பயின்று வரும் 1,783 மாணவிகள் பயனடைவா். இந்த மாணவிகளின் வங்கிக் கணக்கில் மாதம் ரூ.1,000 வீதம் ரூ.2.13 கோடி செலுத்தப்படவுள்ளது என்றாா்.
தொடக்க விழாவில், மாநகராட்சி துணை மேயா் ஆா்.பாலசுப்பிரமணியம், மண்டலத் தலைவா்கள் கோவிந்தசாமி, கோவிந்தராஜ், மாமன்ற உறுப்பினா் திவாகரன், மாவட்ட சமூக நல அலுவலா் ஆா்.அம்பிகா, மாவட்ட கல்வி அலுவலா் திருவளா்ச்செல்வி மற்றும் துறை சாா்ந்த அலுவலா்கள் பங்கேற்றனா்.