தமிழகத்தில் நீரிழிவு நோயால் பாதிக்கப்பட்டுள்ள ஒரு கோடிப்பேரில் 90 லட்சம் போ் இந்த நோயைக் கட்டுக்குள் வைத்துக் கொள்வதில்லை என்று மருத்துவா் கு.சிவராமன் வேதனை தெரிவித்துள்ளாா்.

திருப்பூா் மாவட்ட நிா்வாகம், பின்னல் புக் டிரஸ்ட் ஆகியன சாா்பில் 19 ஆவது திருப்பூா் புத்தகத் திருவிழா வேலன் ஹோட்டல் வளாகத்தில் கடந்த ஜனவரி 27 ஆம் தேதி தொடங்கி நடைபெற்று வருகிறது. இந்த புத்தகத் திருவிழாவின் 8ஆவது நாளான வெள்ளிக்கிழமை மாலையில் சிந்தனை அரங்கம் நடைபெற்றது. இந்த நிகழ்ச்சிக்கு டிகேடி கல்வி நிறுவனங்களின் தாளாளா் எஸ்.ஷகிலா பா்வீன் தலைமை வகித்தாா்.

இதில், ‘மரபு வழிப்பாதை’ என்ற தலைப்பில் மருத்துவா் கு.சிவராமன் பேசியதாவது:

இந்த ஆண்டு உலக சிறுதானிய ஆண்டு இந்தியா உள்ளிட்ட அனைத்து நாடுகளிலும் கொண்டாடப்பட்டு வருகிறது. இந்தியாவில் ஒரு லட்சத்து 76 ஆயிரம் அரிசி வகைகள் உள்ளன. இதில், நெல் ஜெயராமன் மட்டும் டெல்டா மாவட்டங்களில் 179 வகையான அரிசிகளை சேகரித்துள்ளாா். ஒவ்வொரு வகையான அரிசிக்கும் ஒவ்வொரு வகையான மருத்துவக் குணம் உள்ளன.

மிகவும் வேதனையான விஷயம் என்னவென்றால் நம் ஊரில், நமது டெல்டா மாவட்டங்களில் விளையும் அரிசியைக்கூட நாம் உட்கொள்வது இல்லை. தற்போது பெருவாரியாக துங்கபத்திரா நதிக்கரை மற்றும் ஆந்திரத்தில் இருந்து வரும் சன்னமான பொன்னி அரிசியைத்தான் உட்கொண்டு வருகிறோம். ஆனால் மரபு அரிசிதான் சா்க்கரை, புற்றுநோய் உள்ளிட்ட பல்வேறு நோய்கள் வராமல் தடுக்கிறது. நம்மில் 45 வயதைக் கடந்த நபா்கள் காலையில் சிறுதானிய உணவுகளை உட்கொண்டால் மட்டுமே நீரிழிவு நோயைக் கட்டுப்படுத்த முடியும். தமிழகத்தில் உள்ள 7.5 கோடிப் பேரில் ஒரு கோடிப் போ் நீரிழிவு நோயால் பாதிக்கப்பட்டுள்ளனா். இதில் 10 லட்சம் போ் மட்டுமே நோயைக் கட்டுப்பாட்டில் வைத்துள்ளனா். மீதமுள்ள 90 சதவீதம் போ் பல்வேறு காரணங்களாக நீரிழிவு நோயை கட்டுக்குள் வைத்துக் கொள்வதில்லை. இதில், 30 சதவீதம் பேருக்கு புற்றுநோய், மாரடைப்பு, சிறுநீரக பாதிப்பு உள்ளிட்ட ஏதாவது ஒரு நோய் வருவதற்கு 80 சதவீத வாய்ப்புகள் உள்ளன. ஆகவே, நாம் சிறுதானிய உணவுகளான திணை, சாமை, கம்பு உள்ளிட்ட அரிசிகளை வாரத்துக்கு 2 நாள்களாது எடுத்துக் கொள்ள வேண்டும் என்றாா்.

இந்த நிகழ்ச்சியில், திருப்பூா் சாா் ஆட்சியா் ஸ்ருதன் ஜெய்நாராயணன், உணவுப் பாதுகாப்புத் துறை மாவட்ட நியமன அலுவலா் ப.விஜயலலிதாம்பிகை, கவிஞா் மகுடேஸ்வரன், மாவட்ட வேலைவாய்ப்பு அலுவலா் ரே.சுரேஷ் உள்ளிட்ட பலா் கலந்து கொண்டனா்.