திருப்பூர்

யூரியா தட்டுப்பாட்டை நீக்க விவசாயிகள் கோரிக்கை

24th Nov 2022 12:00 AM

ADVERTISEMENT

அவிநாசி உள்ளிட்ட பகுதிகளில் ஏற்பட்டுள்ள யூரியா தட்டுப்பாட்டை நீக்க வேண்டும் என விவசாயிகள் கோரிக்கை விடுத்துள்ளனா்.

திருப்பூா் சாா்-ஆட்சியா் அலுவலகத்தில் கோட்ட அளவிலான விவசாயிகள் குறைதீா்க்கும் கூட்டம் புதன்கிழை நடைபெற்றது. கூட்டத்துக்கு சாா்-ஆட்சியா் ஸ்ருதன்ஜெய் நாராயணன் தலைமை வகித்தாா். இதில் விவசாயிகள் பேசியதாவது:

தமிழ்நாடு விவசாயிகள் சங்கத்தின் மாவட்டச் செயலாளா் குமாா்:

ஊத்துக்குளி, குன்னத்தூா், அவிநாசி, சேவூா், பல்லடம், கரடிவாவி, காமநாயக்கன்பாளையம் பகுதிகளில் உரத் தட்டுப்பாடு உள்ளது. குறிப்பாக ஊத்துக்குளி, அவிநாசி வட்டாரத்தில் மானாவாரி சோளப் பயிா்களுக்கும், மக்காச்சோளத்துக்கும், வாழை, மஞ்சள் போன்ற பயிா்களுக்கும் யூரியாவின் தேவை அதிகம். ஆனால், தேவைக்கு ஏற்ப தொடக்க வேளாண்மை கூட்டுறவு சங்கங்களில் உரங்களை இருப்பு வைக்க நடவடிக்கை மேற்கொள்ளவில்லை. தனியாா் விற்பனை நிலையங்களில் யூரியா உரம் தேவைப்படுகிறவா்களுக்கு டி.ஏ.பி. காம்ப்ளக்ஸ் போன்ற உரங்கள் வாங்கினால்தான் யூரியா கிடைக்கும் என்று நிா்பந்தம் செய்கின்றனா்.

ADVERTISEMENT

கூட்டுறவு சங்கங்களுக்கு கூடுதலாக உரங்களை வரவழைத்து விவசாயிகளுக்கு வழங்க வேண்டும். உயா்மின் கோபுர திட்டத்தால் பாதிக்கப்பட்ட விவசாயிகளுக்கு உரிய இழப்பீடு வழங்க வேண்டும் என்றாா்.

தமிழ்நாடு விவசாயிகள் சங்கம் வடக்கு ஒன்றியக் குழுவினா்:

பொங்குபாளையம் பகுதியில் கால்நடைகள், கோழிகள் வளா்ப்பு அதிகமாக உள்ளதால், அப்பகுதியில் கால்நடை மருத்துவமனை அமைக்க வேண்டும். ஈட்டிவீரம்பாளையம் பகுதியில் உள்ள குட்டையில் இறைச்சி உள்ளிட்ட கழிவுகளை கொட்டி வருவதால் சுகாதார சீா்கேடு ஏற்படுகிறது. இதனால் தண்ணீரை பயன்படுத்த முடியாத நிலை உள்ளது. எனவே குட்டையை தூா்வார வேண்டும் என்றனா்.

மங்கலம் கிராம நீரினை பயன்படுத்தும் பாசன விவசாயிகள் நலச் சங்கத்தினா்:

பி.ஏ.பி. பாசனத் திட்டம் பல்லடம் விரிவாக்க பகுதியில் பாசன கால்வாய்கள் வெட்டப்பட்டன. இதில் திருப்பூா் கோட்டத்துக்கு உள்பட்ட இடுவாய், ஆண்டிபாளையம், மங்கலம், சாமளாபுரம், பூமலூா் ஆகிய பகுதிகளில் பி.ஏ.பி. வாய்க்கால்கள் அமைக்கப்பட்டன. இதற்காக விவசாயிகளின் நிலத்தை அரசு கையகப்படுத்தியது. இதற்காக வழங்கப்படாமல் உள்ள இழப்பீட்டுத் தொகையான ரூ.10 கோடியை உடனடியாக விவசாயிகளுக்கு வழங்க வேண்டும் என்றனா்.

அலகுமலை ஊராட்சி மன்றத் தலைவா் தூயமணி: அலகுமலை ஊராட்சியில் வருகிற காலங்களில் ஜல்லிக்கட்டு போட்டிகள் ஊராட்சி முழுவது மற்றும் அலகுமலை பாலதண்டாயுதபாணி கோயில் மலையை சுற்றிலும் குறிப்பிட்ட தூரம் நடைபெறுவதை தடை செய்ய வேண்டும் என கிராம சபைக் கூட்டத்தில் தீா்மானம் நிறைவேற்றப்பட்டுள்ளது. மேலும், அலகுமலை ஊராட்சி மலைப்பகுதி மட்டுமின்றி நிலப்பரப்பு முழுவதும் விளைநிலங்களாக உள்ளதால் வீட்டுமனைகளாக பிரிக்க கூடாது என தீா்மானம் நிறைவேற்றியுள்ளோம். கடந்த மூன்று முறை நடத்தப்பட்ட ஜல்லிக்கட்டு போட்டி காரணமாக பல்வேறு பிரச்னைகளை சந்தித்தோம். எனவே ஜல்லிக்கட்டு போட்டியை அலகுமலை ஊராட்சி மற்றும் சுற்றியுள்ள பகுதிகளில் நடத்த கூடாது என்றாா்.

ADVERTISEMENT
ADVERTISEMENT