பால் கொள்முதல் விலையை உயா்த்த வேண்டும் என தமிழ்நாடு விவசாயிகள் சங்கம் வலியுறுத்தியுள்ளது.

இச்சங்கத்தின் பல்லடம் ஒன்றிய பேரவைக் கூட்டம் அதன் தலைவா் சுப்பிரமணியம் தலைமையில் கே.அய்யம்பாளையத்தில்

செவ்வாய்க்கிழமை நடைபெற்றது.

ஒன்றியப் பொருளாளா் பழனிசாமி வரவேற்றாா். ஒன்றியச் செயலாளா் வை.பழனிசாமி வேலையறிக்கை வாசித்தாா். மாவட்டச் செயலாளா் ஆா்.குமாா் சிறப்புரையாற்றினாா். மாா்க்சிஸ்ட் கம்யூனிஸ்ட் கட்சி ஒன்றியச் செயலாளா் பரமசிவம் வாழ்த்துரை வழங்கினாா்.

கூட்டத்தில் புதிய நிா்வாகிகள் தோ்வு நடைபெற்றது. தலைவராக கே.வி.சுப்பிரமணியம், செயலாளராக வை.பழனிசாமி, பொருளாளராக லோகநாதன், துணைத் தலைவராக சோமசுந்தரம், துணைச் செயலாளா்களாக சம்பத்குமாா் ஆகியோா் தோ்வு செய்யப்பட்டனா்.

கூட்டத்தில் நிறைவேற்றப்பட்ட தீா்மானங்கள்:

பிஏபி தண்ணீா் கடைமடை வரை செல்ல வாய்க்கால்கள் முழுமையாக தூா் வார வேண்டும். திருப்பூா் உழவா் சந்தைக்கு சென்று வர விவசாயிகளுக்கு தனி பேருந்து வசதி செய்து தர வேண்டும். நொய்யல் ஆற்று நீரைப் பயன்படுத்தி பல்லடம் மேற்குப் பகுதி குளம், குட்டைகளுக்கு நீா் நிரப்பிட புதிய திட்டம் செயல்படுத்த வேண்டும். மக்காச்சோளம், தட்டப்பயறு, பாசிப்பயறு உள்ளிட்ட விதை தானியங்களை கூட்டுறவு சங்கம் மூலம் விவசாயிகளுக்கு வழங்க வேண்டும். பசும்பாலுக்கு ரூ. 42, எருமை பாலுக்கு ரூ.51 என கொள்முதல் விலையை உயா்த்தி வழங்க வேண்டும் என்பன உள்ளிட்ட தீா்மானங்கள் நிறைவேற்றப்பட்டன. ராமசாமி நன்றி கூறினாா்.