கனல் கண்ணன் கைது செய்யப்பட்டதைத் கண்டித்து திருப்பூா் மற்றும் காங்கயத்தில் ஆா்ப்பாட்டத்தில் ஈடுபட்ட இந்து முன்னணி அமைப்பைச் சோ்ந்த 377 பேரை காவல் துறையினா் கைது செய்தனா். ,

ஸ்ரீரங்கம் பெரியாா் சிலை குறித்து சா்ச்சைக்குரிய வகையில் பேசியதாக திரைப்பட சண்டைப் பயிற்சியாளா் கனல் கண்ணனை சென்னை சைபா் குற்றப் பிரிவு காவல் துறையினா் திங்கள்கிழமை கைது செய்தனா். இந்த சம்பவத்தை கண்டித்து இந்து முன்னணி சாா்பில் தமிழகம் முழுவதும் செவ்வாய்க்கிழமை ஆா்ப்பாட்டம் நடைபெறும் என்று அறிவிக்கப்பட்டிருந்தது.

இதன்படி, திருப்பூா் மாநகராட்சி அலுவலகம் முன்பாக நடைபெற்ற ஆா்ப்பாட்டத்துக்கு இந்து முன்னணி மாநிலத் தலைவா் காடேஸ்வரா சி.சுப்பிரமணியம் தலைமை வகித்தாா். அப்போது அவா் செய்தியாளா்களிடம் பேசியதாவது:

தமிழகத்தில் தற்போது நெருக்கடி நிலையில் இருந்ததைவிட மோசமான ஆட்சி நடைபெற்று வருகிறது. குறிப்பாக ஹிந்துக்களின் மீது கைது நடவடிக்கைகளும், பொய் வழக்குப் பதிவு செய்வதுமாக உள்ளது. காவல் துறையில் கிறிஸ்தவ மதத்தைச் சாா்ந்தவா்களின் ஆதிக்கம் அதிகமாக உள்ளது. நடராஜா் சிலையை கேவலப்படுத்தியவா்களையும், ஹிந்துக்களை அழிப்பதாகக் சொல்லியவா்களையும், இஸ்ஸாமியா்களுக்கு தனிநாடு வேண்டும் என்ற கிறிஸ்தவ மதபோதகா் ஆகியோா் மீதும் எந்த நடவடிக்கையும் இல்லை. ஆனால், கனல் கண்ணன் வழிபாட்டுத் தலத்தின் முன்னாள் கடவுளுக்கு எதிரான உள்ள வாசகத்தை எடுக்க வேண்டும் என்று சொன்னதில் எந்தவிதமான தவறும் இல்லை. இதை இந்து முன்னணி முழுமையாக ஆதரிக்கிறது. அவரை பயங்கரவாதியைப்போல தேடிப்பிடித்து காவல் துறை கைது செய்துள்ளது.

ஹிந்து அமைப்பைச் சோ்ந்தவா்களையும், ஹிந்துக்களுக்கு ஆதரவாக பேசுபவா்களையும் கைது செய்வது அரசின் வேலையாக உள்ளது. இதை இந்த அரசும், காவல் துறையும் மாற்றிக் கொள்ள வேண்டும். கனல் கண்ணனை விடுதலை செய்யாவிட்டால் ஆன்மிக பெரியவா்களையும், மடாதிபதிகளையும் இணைத்து பெரிய அளவில் போராட்டம் நடத்தப்படும் என்றாா்.

இதைத் தொடா்ந்து, அனுமதியின்றி ஆா்ப்பாட்டத்தில் ஈடுபட்டதாக காடேஸ்வரா சி.சுப்பிரமணியம், மாநிலச் செயலாளா் ஜெ.எஸ்.கிஷோா்குமாா் உள்ளிட்ட 350 பேரை திருப்பூா் தெற்கு காவல் துறையினா் கைது செய்தனா்.

காங்கயத்தில்...

இதே கோரிக்கைகளை வலியுறுத்தி திருப்பூா் தெற்கு மாவட்ட இந்து முன்னணி சாா்பில் காங்கயம் நகரப் பேருந்து நிலையம் அருகே நடைபெற்ற ஆா்ப்பாட்டத்துக்கு கோட்டச் செயலாளா் கோவிந்தராஜ் தலைமை வகித்தாா். இதில் இந்து முன்னணி மாவட்டத் தலைவா் கந்தசாமி, பொதுச் செயலாளா் சதீஷ்குமாா், செயலாளா் சங்கிலித்துரை, விஸ்வ ஹிந்து பரிஷத் அமைப்பின் மாவட்டத் தலைவா் ராஜகோபால், பிகேஎஸ் மாவட்ட அமைப்பாளா் பெரியசாமி, ஆா்எஸ்எஸ் செல்வம் உள்ளிட்ட 27 பேரை போலீஸாா் கைது செய்தனா்.