காங்கயம்: காங்கயம் அருகே, முள்ளிபுரத்தில் உள்ள அரசு கலை-அறிவியல் கல்லூரியில் மாணவ-மாணவிகள் நேரடி சேர்க்கை செப்.30 ஆம் தேதி வரை நடைபெறும் எனத் தெரிவிக்கப்பட்டுள்ளது.

இது குறித்து காங்கயம் அரசு கலை மற்றும் அறிவியல் கல்லூரி முதல்வர் அனுராதா வெளியிட்டுள்ள செய்திக் குறிப்பில் கூறியுள்ளதாவது: காங்கயம் அரசு கலைக் கல்லூரியில் தற்போதைய 2020-2021 கல்வி ஆண்டுக்கான பி.ஏ தமிழ், பி.ஏ., ஆங்கிலம், பி.ஏ., பொருளாதாரம், பி.பி.ஏ., பி.காம், பி.எஸ்.சி., கணிதம், பி.எஸ்.சி., கணினி அறிவியல் ஆகிய 7 பாடப் பிரிவுகள் அடங்கிய இளங்கலை, இளங்கலை அறிவியல் பட்டப் படிப்புகளுக்கான இறுதிக் கட்ட மாணவ-மாணவிகள் நேரடி சேர்க்கை தற்போது நடைபெற்று வருகிறது.

இதன்படி, இந்தக் கல்லூரியில் தற்போது அமலில் உள்ள கல்வி ஆண்டுக்கு இளங்கலை பயிலுவதற்கு விண்ணப்பித்த, விண்ணப்பிக்காத அனைத்து மாணவ-மாணவிகளும் சேர்ந்திட அரசு அனுமதி வழங்கி உள்ளது. எனவே இக் கல்லூரியில் பயில விருப்பம் உள்ள மாணவ-மாணவிகள் தங்களது ஆதார் அட்டை, பள்ளி மாற்றுச் சான்றிதழ், மதிப்பெண்கள் பட்டியல், சாதிச் சான்று, 2 பாஸ்போர்ட் சைஸ் புகைப்படம் மற்றும் இவைகளின் 3 வகை நகல்கள் ஆகியவற்றுடன் கல்லூரிக்கு வேலை நாள்களில் நேரில் வந்து சேர்க்கை பெற்று, பயன்பெறலாம். மேலும் இந்த அரசு கலைக் கல்லூரியில் வருகிற 30 ஆம் தேதி (புதன்கிழமை) வரை மாணவர் சேர்க்கை நடைபெற உள்ளது. இவ்வாறு அதில் கூறப்பட்டுள்ளது.