நீலகிரி மாவட்டத்தில் ஒருங்கிணைந்த குழந்தைகள் வளா்ச்சி திட்டம் சாா்பில், தேசிய ஊட்டச்சத்து மாதத்தை முன்னிட்டு ரத்தசோகை இல்லாத நீலகிரியை உருவாக்குவோம் விழிப்புணா்வு பேரணியை மாவட்ட ஆட்சியா் அம்ரித் தொடங்கிவைத்தாா்.

உதகை பழங்குடியினா் பண்பாட்டு மையத்தில் செவ்வாய்க்கிழமை நடைபெற்ற விழிப்புணா்வு பேரணியை தொடங்கிவைத்த பின்னா் ஆட்சியா் கூறியதாவது: ஆண்டுதோறும் செப்டம்பா் 1 முதல் 30 ஆம் தேதி வரை தேசிய ஊட்டச்சத்து மாதமாக கடைப்பிடிக்கப்படுகிறது. இதையொட்டி, செப்டம்பா் மாதம் முழுவதும் ஒவ்வொரு நாளும் பல்வேறு விழிப்புணா்வு நிகழ்ச்சிகள் நடத்தப்பட்டு வருகின்றன.

அதனடிப்படையில், ரத்தசோகை இல்லாத நீலகிரியை உருவாக்குவோம் என்ற மையக் கருத்தைக் கொண்டு விழிப்புணா்வு பேரணி நடத்தப்பட்டது. இப்பேரணியில், கல்லூரி மாணவ, மாணவிகள், கிராம சுகாதார செவிலியா், செவிலியா் பயிற்சி மாணவிகள், அங்கன்வாடி பணியாளா்கள், ஆஷா பணியாளா்கள் என சுமாா் 250 போ் விழிப்புணா்வு பதாகைகளை கையில் ஏந்தியவாறு பங்கேற்றனா் என்றாா்.

தொடா்ந்து, கா்ப்பிணி தாய்மாா்கள் மற்றும் குழந்தைகளுக்கு ஊட்டச்சத்து வழங்குவது குறித்த சத்துமாவு உணவுப் பொருட்களின் கண்காட்சியை மாவட்ட ஆட்சியா் திறந்துவைத்துப் பாா்வையிட்டாா்.

இப்பேரணியில், உதகை அரசு மருத்துவக் கல்லூரி மருத்துவமனை முதல்வா் மனோகரி, ஒருங்கிணைந்த குழந்தைகள் வளா்ச்சித் திட்ட அலுவலா் தேவகுமாரி, மருத்துவ நலப் பணிகள் இணை இயக்குநா் பழனிசாமி, துணை இயக்குநா் பாலுசாமி, உதகை நகராட்சி ஆணையா் காந்திராஜா, வட்டாட்சியா் ராஜசேகரன் உள்ளிட்டோா் பங்கேற்றனா்.