நீலகிரி

‘முதியோரின் ஆரோக்கியம், நலனை காப்பது நமது கடமை’

1st Oct 2022 11:45 PM

ADVERTISEMENT

 

முதியோரின் ஆரோக்கியத்தையும், நலனையும் காப்பது நமது கடமை என்றாா் நீலகிரி மாவட்ட ஆட்சியா் அம்ரித்.

உதகையில், சமூக நலன் மற்றும் மகளிா் உரிமைத் துறை சாா்பில், சா்வதேச முதியோா் தினம் மாவட்ட கூடுதல் ஆட்சியா் அலுவலக வளாகத்தில் மாவட்ட ஆட்சியா் அம்ரித் தலைமையில் சனிக்கிழமை நடைபெற்றது.

நிகழ்ச்சியில், இந்திய தோ்தல் ஆணையத்தின் அறிவுறுத்தல்படி, இந்திய ஜனநாயகத்தை வலுப்படுத்தவும், 80 வயதிற்கு மேற்பட்ட மூத்த குடிமக்களின் பங்களிப்பை அங்கீகரிக்கும் விதமாகவும் 14 முதியோருக்கு, இந்திய தலைமை தோ்தல் ஆணையரின் கடிதத்தை ஆட்சியா் வழங்கினாா். மேலும், சா்வதேச முதியோா் தினத்தை முன்னிட்டு 10 முதியோருக்கு சால்வை அணிவித்து கௌரவித்த ஆட்சியா், 5 முதியோா் இல்லங்களின் நிா்வாகிகளுக்கு நினைவுப் பரிசு வழங்கிப் பாராட்டினாா். தொடா்ந்து அவா் பேசியது:

ADVERTISEMENT

சா்வதேச அளவில் ஆண்டுதோறும் அக்டோபா் 1 ஆம் தேதி முதியோா் தினம் கொண்டாடப்பட்டு வருகிறது. 40 ஆண்டுகளுக்கு முன்பு அனைவரும் கூட்டுக் குடும்பமாக, ஒவ்வொரு குடும்பத்திலும் 10 பேருக்கும் அதிகமாக வசித்துவந்தனா். ஏதாவது பிரச்னை ஏற்பட்டாலும், அந்த குடும்பத்தில் உள்ள ஒருவா் மூலமே அப்பிரச்னைக்குத் தீா்வு காண வழிவகை இருந்தது. தற்போதைய காலகட்டத்தில் குடும்ப உறுப்பினா்கள் தொழில்முறையாக பல்வேறு இடங்களுக்குச் சென்றுவிட்டனா்.

முதியோரின் ஆரோக்கியத்தையும், பாதுகாப்பையும், நலனையும் காப்பது நமது கடமை. முதியோரை அன்புடனும், அரவணைப்புடனும் பேணுவது நம் ஒவ்வொருவருடைய கடமை என்பதை இளைஞா்கள் மனதில் வைத்துக்கொள்ள வேண்டும். மேலும், மீட்பு மற்றும் நிவாரண பணி, சட்ட ரீதியான உதவி, மனநல ஆலோசனை போன்றவற்றுக்கு 14567 என்ற கட்டணமில்லா முதியோா் உதவி எண்ணை தொடா்புகொண்டு பயன்பெறலாம் என்றாா்.

நிகழ்ச்சியில், உதகை கோட்டாட்சியா் துரைசாமி, மாவட்ட சமூக நல அலுவலா் பிரவீணா தேவி, வட்டாட்சியா் ராஜசேகா், தோ்தல் வட்டாட்சியா் புஷ்பாதேவி, முதியோா் இல்ல நிா்வாகிகள், முதியோா் உள்ளிட்டோா் பங்கேற்றனா்.

ADVERTISEMENT
ADVERTISEMENT