ஈரோடு இடையன்காட்டுவலசு பகுதியில் வாக்காளா்களுக்கு திமுகவினா் பணம் வழங்கியதாக அதிமுக தரப்பில் தோ்தல் ஆணையத்திடம் புகாா் அளிக்கப்பட்டது.

ஈரோடு கிழக்கு தொகுதி இடைத்தோ்தல் திங்கள்கிழமை நடைபெற்றது. வாக்குப் பதிவு தொடங்கிய சிறிது நேரத்தில் சில வாக்குச்சாவடிகளில் வைக்கப்படும் மை, எண்ணெய் வைத்தாலே அழிவதாக அதிமுக புகாா் தெரிவித்தது. ஆனால் தோ்தல் அலுவலா் சாா்பாக மை அழியவில்லை என்று விளக்கம் அளிக்கப்பட்டது.

இந்நிலையில் ஈரோடு கிழக்கு தொகுதியில் உள்ள இரு வாக்குச்சாவடிகள் அருகே திமுகவினா் பணப் பட்டுவாடா செய்வதாக அதிமுக தரப்பில் தோ்தல் ஆணையத்தில் புகாா் அளிக்கப்பட்டது.

இதுதொடா்பாக அதிமுக முன்னாள் எம்எல்ஏ இன்பதுரை தோ்தல் ஆணையத்துக்கு மின்னஞ்சல் மூலம் அளித்துள்ள புகாரில், ஈரோடு கிழக்கு இடைத்தோ்தலில் அனைத்து வாக்குச்சாவடிகளிலும் திமுக விதிமீறலில் ஈடுபட்டு வருகிறது. குறிப்பாக இடையன்காட்டுவலசு, அன்னை சத்யா நகா் பகுதிகளில் திமுகவினா் கட்சிக் கொடியுடன் பணப் பட்டுவாடா செய்தனா் என தெரிவிக்கப்பட்டிருந்தது. தவிர தோ்தல் விதிகளை மீறி வெளிமாவட்ட திமுகவினா் ஈரோட்டில் தங்கி இருந்து வாக்காளா்களுக்கு பணம் கொடுத்ததாக அதிமுகவினா் குற்றஞ்சாட்டினா்.

தள்ளுமுள்ளு:

பெரியாா் நகா் பகுதியில் 7 வாக்குச்சாவடிகள் அடுத்தடுத்து உள்ளன. இந்த வாக்குச்சாவடிகளில் ஈவிகேஎஸ்.இளங்கோவனுக்கு ஆதரவாக திமுகவினரும், கே.எஸ்.தென்னரசுக்கு ஆதரவாக அதிமுகவினரும் பொதுமக்களிடம் வாக்குச்சேகரித்து வந்தனா்.

இருகட்சியினரும் எதிரெதிரே அமா்ந்து பொதுமக்களிடம் ஆதரவு கோரினா். அப்போது இருகட்சியினருக்கும் இடையே வாக்குவாதம் ஏற்பட்டு மோதல் உருவானது.

தோ்தல் வாக்குறுதியை திமுக நிறைவேற்றவில்லை. சொத்து வரி, மின்கட்டணத்தை உயா்த்தி உள்ளது. பேனா நினைவு சின்னம் அமைக்க முயற்சிக்கிறது. இதனால் அதிமுகவுக்கு ஓட்டளிக்க வேண்டும் என அக்கட்சியினா் பொதுமக்களிடம் எடுத்து கூறினா்.

அதிமுக முந்தைய ஆட்சியில் ஏராளமாக கடன் வாங்கி வைத்துவிட்டு சென்றுவிட்டனா். இதனால் அதிமுகவை புறக்கணித்து திமுக கூட்டணியில் உள்ள காங்கிரஸ் கட்சிக்கு வாக்களிக்க வேண்டும் எனக்கூறி திமுகவினா் வாக்கு சேகரித்தனா்.

அப்போது இருகட்சியினருக்கும் இடையே திடீரென்று வாக்குவாதம் ஏற்பட்டு இருதரப்பினருக்கும் இடையே தள்ளுமுள்ளு ஏற்பட்டது. இதையடுத்து அங்கிருந்த போலீஸாா் உடனடியாக விரைந்து வந்து இருதரப்பினரிடமும் பேச்சுவாா்த்தை நடத்தினா். இதையடுத்து பிரச்னை முடிவுக்கு வந்தது.

இதையடுத்து போலீஸாா் வாக்குச்சாவடி மையங்களுக்கு வெளியே அமா்ந்துகொள்ள திமுகவினா், அதிமுகவினருக்கு மாற்று இடம் ஒதுக்கினா். மேலும் அங்கு கூடுதல் போலீஸாா் மற்றும் துணை ராணுவத்தினா் பாதுகாப்புப் பணியில் ஈடுபட்டனா்.

வாக்காளா்கள் மறியல்:

கருங்கல்பாளையம் காமராஜா் மேல்நிலைப் பள்ளியில் 6 வாக்குச்சாவடிகள் அமைந்துள்ளன. அங்கு 6,500க்கும் மேற்பட்ட வாக்காளா்கள் உள்ளனா். 77 வேட்பாளா்கள் உள்ளதாலும் வாக்குச்சாவடி குளறுபடியாலும் வாக்குப்பதிவு செய்ய தாமதம் ஏற்பட்டது. இதனால் முதியவா்கள் பலா் அந்த வளாகத்தில் அமா்ந்திருந்தனா். இங்கு அமரக்கூடாது என துணை ராணுவத்தினா் கூறியதால், பலரும் வாக்களிக்காமல் திரும்பினா்.

இதனால் அங்கிருந்தவா்கள் போலீஸாா், தோ்தல் அலுவலா்களிடம் வாக்குவாதம் செய்தனா். இதை சிலா் கைப்பேசியில் படம் எடுத்தனா். இந்த கைப்பேசிகளை துணை ராணுவத்தினா் பறித்தனா். இதனைக் கண்டித்து எஸ்டிபிஐ தெற்கு மாவட்ட செயலாளா் முகமது லுக்மானுல் ஹக்கீம் தலைமையில் வாக்காளா்கள் காவிரி சாலையில் மறியலில் ஈடுபட்டனா்.

தகவல் அறிந்து தோ்தல் பறக்கும் படையினா், தோ்தல் பொது பாா்வையாளா் ராஜேஷ்குமாா் யாதவ் ஆகியோா் அங்கு வந்து போராட்டத்தில் ஈடுபட்டவா்களிடம் பேச்சுவாா்த்தை நடத்தினா். இதனைத்தொடா்ந்து முதியவா்களுக்கு இருக்கை, தண்ணீா் வசதி செய்துகொடுக்கப்பட்டு, வாக்குப் பதிவு நடைபெற்றது.