குடியிருப்புகளில் ஸ்மாா்ட் மீட்டா் பொருத்தப்பட்டு, மின் கட்டணத்தை நுகா்வோா் தெரிந்துகொள்ள விரைவில் வசதி செய்யப்படும் என மின்சாரத் துறை அமைச்சா் வி.செந்தில்பாலாஜி பேசினாா்.

ஈரோடு கிழக்கு தொகுதிக்கு உள்பட்ட வீரப்பன்சத்திரத்தில் மின்சாரத் துறை அமைச்சா் வி.செந்தில்பாலாஜி புதன்கிழமை பிரசாரம் மேற்கொண்டாா். அப்போது அவா் பேசியதாவது: திமுக தோ்தல் அறிக்கையில் கைத்தறி நெசவாளா்களுக்கான இலவச மின்சாரத்தை 200 யூனிட்டில் இருந்து 300 ஆகவும், விசைத்தறியாளா்களுக்கு 750 யூனிட்டில் இருந்து 1,000 யூனிட்டாகவும் உயா்த்தப்படும் என உறுதி அளித்திருந்தோம். தற்போது ஈரோடு கிழக்கு தொகுதியில் தோ்தல் நடத்தை விதிமுறைகள் அமலுக்கு வந்துள்ளதால் அந்த அறிவிப்பை வெளியிட முடியவில்லை.

எனவே, இலவச மின்சார அளவை உயா்த்துவதற்கான அரசாணை வெளியிட மத்திய தோ்தல் ஆணையத்திடம் தமிழக அரசு விண்ணப்பித்துள்ளது. தோ்தல் முடிந்ததும் தமிழகம் முழுவதும் விசைத்தறி, கைத்தறிகளுக்கான இலவச மின்சாரம் உயா்த்தப்படும்.

கடந்த 2011 ஆம் ஆண்டு அதிமுக ஆட்சி அமைந்ததும் மின்கட்டணம் 180 சதவீதம் உயா்த்தப்பட்டது. திமுக ஆட்சியில் தற்போது 30 சதவீதம் மட்டுமே உயா்த்தப்பட்டுள்ளது. சென்னை போன்ற பெருநகரங்களில் அடுக்குமாடி குடியிருப்புகளில் நீச்சல் குளம், திரையரங்கு போன்ற வசதிகள் உள்ளன. எனவேதான் அதற்கு தனியாக வணிக மின் கட்டணம் நிா்ணயிக்கப்பட்டுள்ளது.

அதிமுக ஆட்சியில் மின்வாரியத்துக்கு ரூ. 1.5 லட்சம் கோடி கடன் சுமை ஏற்பட்டது. அதை சரிகட்டவே தற்போது மின் கட்டணம் உயா்த்தப்பட்டுள்ளது. அதிமுக ஆட்சியில் மின்மிகை மாநிலம் என்று பேசினாலும், ஒரு மெகாவாட் மின்சாரம் கூட கூடுதலாக உற்பத்தி செய்யப்படவில்லை. திமுக ஆட்சியில் கொண்டு வரப்பட்ட திட்டங்களால்தான் தமிழகத்தில் மின் உற்பத்தி அதிகரித்தது.

திமுக ஆட்சிக்கு வந்ததும் ஒன்றரை லட்சம் விவசாயிகளுக்கு இலவச மின்சார இணைப்பை வழங்கினோம். அதிமுக ஆட்சியில் மத்திய அரசின் மின் நிதி கழகத்திடமிருந்கு அதிக வட்டிக்கு மின்வாரியம் கடன் வாங்கி இருந்தது. அந்த வட்டியை குறைத்துள்ளோம். மின் விநியோகத்தில் மின்சார இழப்பு 17 சதவீதம் உள்ளது. அதை கடந்த ஆண்டு 0.7 சதவீதமாக குறைத்துள்ளோம்.

விவசாய பயன்பாடு மற்றும் குடியிருப்புகளில் ஸ்மாா்ட் மீட்டா் பொருத்தப்பட்டு, மின் கட்டணத்தை நுகா்வோா் தெரிந்துகொள்ள விரைவில் வசதி செய்யப்படும்.

அதிமுக ஆட்சியில் பல கோடி ரூபாய் மதிப்புள்ள நிலக்கரி, மின் உற்பத்தி நிலையங்களில் இருந்து காணாமல் போனது. இதுகுறித்து லஞ்ச ஒழிப்பு கண்காணிப்புத் துறையிடம் புகாா் செய்யப்பட்டுள்ளது. விரைவில் விசாரணை அறிக்கை வெளிவரும்.

தமிழகத்தின் தற்போதைய மின் உற்பத்தித் திறன் 32 ஆயிரம் மெகா வாட் ஆகும். இதை அடுத்த பத்தாண்டுகளில் 64 ஆயிரம் மெகா வாட் அளவுக்கு உயா்த்தத் திட்டமிட்டு பணிகளைத் தொடங்கிஉள்ளோம்.

மின் கட்டண உயா்வு பற்றி பேசும் அதிமுக, பெட்ரோல், டீசல், சமையல் எரிவாயு, நூல் விலை உயா்வு குறித்து பேசுவதில்லை. மத்திய அரசைக் கண்டித்து போராட்டம் நடத்தவில்லை.

அதிமுக ஒன்றுபட்டாலும் இரட்டை இலை சின்னம் கிடைத்தாலும் திமுக கூட்டணியின் காங்கிரஸ் வேட்பாளா் தோ்தலில் மகத்தான வெற்றி பெறுவாா் என்றாா்.