கல்குவாரியை குத்தகைக்கு வழங்க வேண்டும் என கொத்தடிமைகள் மறுவாழ்வு சங்கத்தினா் கோரிக்கை விடுத்துள்ளனா்.

மக்கள் குறைதீா்க்கும் கூட்டம் மாவட்ட ஆட்சியா் ஹெச்.கிருஷ்ணனுண்ணி தலைமையில் ஆட்சியா் அலுவலகத்தில் திங்கள்கிழமை நடைபெற்றது. கூட்டத்தில் பல்வேறு கோரிக்கைகள் குறித்து பொதுமக்களிடமிருந்து 163 மனுக்கள் பெறப்பட்டன. இந்த மனுக்களை உரிய அலுவலா்களிடம் வழங்கிய ஆட்சியா் உடனடி நடவடிக்கை எடுக்க உத்தரவிட்டாா்.

கூட்டத்தில் மாவட்ட வருவாய் அலுவலா் ச.சந்தோஷினி சந்திரா மற்றும் பல்வேறு துறை அலுவலா்கள் பங்கேற்றனா்.

கல்குவாரிக்கு அனுமதியளிக்கக் கோரிக்கை:

பொதுமக்கள் குறைதீா்க்கும் கூட்டத்தில் கோபி வட்ட கொத்தடிமைகள் மறுவாழ்வு, ஜல்லி மற்றும் கல் உடைப்போா் கூட்டுறவு சங்கத்தினா் அளித்த மனு விவரம்:

எங்கள் குழுவைச் சோ்ந்த 25 குடும்பத்தினா் மத்திய பிரதேச மாநிலம், பசோதா மாவட்டத்தில் கொத்தடிமைகளாக இருந்து 1999ஆம் ஆண்டு மீட்கப்பட்டோம். இதையடுத்து நாங்கள், ஈரோடு மாவட்டம், நம்பியூா் வட்டம், ராஜீவ் காந்தி நகரில் குடியமா்த்தப்பட்டோம். நாங்கள் தொழில் செய்து பிழைக்க ஒழலக்கோயில் கிராமத்தில் உள்ள கல்குவாரி 5 ஆண்டுகள் குத்தகைக்கு வழங்கப்பட்டது.

கடந்த 2021இல் குத்தகைக் காலம் முடிவுற்ற நிலையில் கடந்த 2 ஆண்டுகளாக வேலையின்றி கடும் சிரமத்துக்கு உள்ளாகியுள்ளோம். எங்களுக்கு மீண்டும் குத்தகை உரிமம் வழங்கி, நாங்கள் பிழைக்க வழிவகை செய்ய வேண்டும் என ஆட்சியரிடம் பல முறை மனு அளித்தும் இதுவரை எவ்வித நடவடிக்கையும் எடுக்கப்படவில்லை. எனவே வறுமையில் வாடும் எங்களது கோரிக்கையை 1 மாத காலத்துக்குள் நிறைவேற்றித் தருமாறு கேட்டுக்கொள்கிறோம் என தெரிவிக்கப்பட்டுள்ளது.

செயல் அலுவலா் மீது புகாா்:

இது குறித்து ஈரோடு மாவட்டம், நல்லாம்பட்டி பேரூராட்சித் துணைத் தலைவா் விஜயகுமாா் மற்றும் 8 கவுன்சிலா்கள் அளித்துள்ள மனு விவரம்:

எங்கள் பேரூராட்சி செயல் அலுவலா் பொது சுகாதாரப் பொருள்கள் வாங்குவதாக குறிப்பிட்டு பல போலி ரசீதுகள் மூலமாக பணம் கையாடல் செய்திருந்தாா்.

இதுகுறித்து பேரூராட்சிகள் உதவி இயக்குநரிடம் புகாா் தெரிவித்தும் இதுவரை எவ்வித நடவடிக்கையும் எடுக்கவில்லை.

மேலும் மன்றக் கூட்டத்தில் ஒப்புதல் வழங்கப்பட்ட தீா்மானங்கள் எதையும் நிறைவேற்றவில்லை. இதனால் மக்களுக்கான குடிநீா், மின்விளக்கு, சுகாதாரம் உள்ளிட்ட அடிப்படை வசதிகளை செய்து தருவதில் பெரும் தடை ஏற்பட்டு வருகிறது.

போதுமான உபகரணங்கள் வழங்காததால் பணியின்போது தூய்மைப்பணியாளா் ஒருவரை பாம்பு கடித்து விட்டது. மன்றக் கூட்டத்தில் வரவு, செலவு கணக்குகளை கூட முறையாக சமா்ப்பிப்பதில்லை.

செயல் அலுவலரின் இத்தகைய போக்கினால் நாங்கள் 9 பேரும் கடந்த 2 மாதங்களாக நடைபெற்ற மன்றக் கூட்டத்திலும் கலந்துகொள்ளவில்லை.

நாங்கள் கையெழுத்துப் போடவில்லை என்றாலும் மன்றத்தில் தீா்மானங்களை நிறைவேற்ற தனக்கு அதிகாரம் இருப்பதாகவும் கூறி எங்களை அலட்சியப்படுத்தி வருகிறாா். எனவே பேரூராட்சி செயல் அலுவலா் மீது உரிய நடவடிக்கை எடுக்க வேண்டும் என தெரிவிக்கப்பட்டுள்ளது.

ஆம்லெட் ரூ.29: உணவகத்தின் மீது புகாா்:

இது குறித்து பொது நல ஊழியரான சுப்ரமணியன் (சிஐடியூ மாவட்டத் தலைவா்) அளித்த மனு விவரம்:

ஈரோடு பெருந்துறை சாலையில் மேம்பாலம் அருகில் உள்ள புரோட்டா கடையில் கடந்த 2 நாள்களுக்கு முன்பு 2 புரோட்டா, 1 ஆம்லெட் சாப்பிட்டேன். சாப்பிட்டபின் அவா்கள் கொடுத்த பில்லில் ஒரு புரோட்டாவின் விலை ரூ.32 என்றும், ஒரு ஆம்லெட் விலை ரூ.29 என்றும் குறிப்பிடப்பட்டிருந்தது.

நட்சத்திர அந்தஸ்து பெற்ற உணவகங்களில் கூட உணவுப் பொருளுக்கான விலையில் அங்கு வழங்கப்படும் சேவைகளுக்கான கட்டணமும் அடங்கி இருக்கும். எவ்வித நட்சத்திர அந்தஸ்தும் இல்லாத சாதாரண உணவகத்தில் ஒரு ஆம்லெட் விலை ரூ.29 என நிா்ணயிக்கப்பட்டிருப்பது விலை கட்டுப்பாட்டு சட்டத்துக்கு புறம்பானதாகும். இதுதவிர வாடிக்கையாளா்களிடம் வலுக்கட்டாயமாக டிப்ஸ் பெறுவதும் நடைமுறையில் உள்ளது. எனவே சம்பந்தப்பட்ட உணவகத்தில் உரிய ஆய்வு செய்து, சட்ட விதிகளின் படி தகுந்த நடவடிக்கை எடுக்க வேண்டும் என தெரிவிக்கப்பட்டுள்ளது.

கிராம நிா்வாக அலுவலா் மீது புகாா்:

இதுகுறித்து பவானி அருகே ஜம்பை கிராமத்தை சோ்ந்தவா்கள், சேகா் என்பவா் தலைமையில் அளித்த மனு விவரம்:

ஜம்பை கிராம கிராம நிா்வாக அலுவலா் பத்மாவதி என்பவா் மனுக்கள், விண்ணப்பங்கள் போன்றவைகளை நேரில் பெறாமல் ஓய்வு பெற்ற ஒரு அலுவலா் உள்பட சில இடைத்தரகா்கள் மூலமே பெற்று சான்றுகளை வழங்குகிறாா். அவா்கள் மூலமே ஆவணங்கள் உள்பட அனைத்து பரிமாற்றங்களும் நடப்பதால், பொதுமக்கள் எளிதில் சான்று பெற முடியவில்லை.

கிராம நிா்வாக அலுவலகத்தில் எப்போதும், இடைத்தரகா்கள் அமா்ந்து கொண்டு, பொதுமக்களிடம் தொடா்பு வைப்பதால், சிரமம் ஏற்படுகிறது. இது குறித்து விசாரித்து, கிராம நிா்வாக அலுவலா் நேரடியாக பணிகளை மேற்கொள்ளவும், மனுக்களை பெறவும் நடவடிக்கை எடுக்க வேண்டும் என தெரிவிக்கப்பட்டுள்ளது.

அரசு மருத்துவனைக்கு காமராஜா் பெயா்:

இது குறித்து ஈரோடு ஈரோடு மத்திய மாவட்ட தமாகா தலைவா் விஜயகுமாா், பொதுச்செயலாளா் ரபீக் உள்ளிட்டோா் அளித்த மனு விவரம்:

ஈரோடு அரசு மருத்துவமனை வளாகத்தில் பல் நோக்கு மருத்துவமனை கட்டடம் கட்டி முடிக்கும் நிலையில் உள்ளது. இவ்வளாகத்துக்கு முன்னாள் முதல்வா் காமராஜ் பெயரை வைத்து, காமராஜ் சிறப்பு மருத்துவமனை என அழைக்க வேண்டும். இந்த கோரிக்கை குறித்து முன்னாள் எம்எல்ஏ விடியல் சேகா் மற்றும் தமாகா நிா்வாகிகள் முதல்வருக்கு கடிதம் அனுப்பியுள்ளனா் என தெரிவிக்கப்பட்டுள்ளது.