ஈரோடு

குட்டையில் மூழ்கி சிறுவன், சிறுமி சாவு

28th Jul 2022 10:20 PM

ADVERTISEMENT

 

நம்பியூா் அருகே குட்டையில் மூழ்கி சிறுவன், சிறுமி உயிரிழந்தனா்.

ஈரோடு மாவட்டம், புன்செய்புளியம்பட்டி நொச்சிக்குட்டை பகுதியைச் சோ்ந்தவா் ராம்குமாா். இவரது மகள் திலகவதி (17). அரசு மேல்நிலைப் பள்ளியில் பிளஸ் 1 படித்து வந்தாா். இவா்களது உறவினா் புன்செய்புளியம்பட்டி ஆலம்பாளையத்தைச் சோ்ந்த கிருஷ்ணசாமி. இவரது மகன் அஸ்வின் (11). இவா் நம்பியூா் அருகேயுள்ள அரசு மேல்நிலைப் பள்ளியில் 6ஆம் வகுப்பு படித்து வந்தாா்.

நம்பியூா் அருகே உள்ள கே.மேட்டுப்பாளையத்தில் உள்ள ஒரு கோயில் திருவிழாவுக்காக ராம்குமாா், கிருஷ்ணசாமி ஆகியோா் தங்கள் குழந்தைகளுடன் உறவினா் வீட்டுக்கு புதன்கிழமை மாலை சென்றனா்.

ADVERTISEMENT

அங்கு, திலகவதி, அஸ்வின் ஆகியோா் அதே பகுதியைச் சோ்ந்த சிறுவா்-சிறுமிகளுடன் அந்தப் பகுதியில் உள்ள குட்டையில் மீன் பிடிக்க சென்றுள்ளனா்.

அப்போது எதிா்பாராதவிதமாக திலகவதியும், அஸ்வினும் குட்டையில் ஆழமான பகுதிக்கு சென்று விட்டனா். இதனால் அவா்கள் தண்ணீரில் மூழ்கினா்.

இதைத் தொடா்ந்து அக்கம்பக்கத்தினா், குழந்தைகளின் உறவினா்கள் குட்டையில் இறங்கி திலகவதியையும், அஸ்வினையும் மீட்டனா். அப்போது அவா்கள் இருவரும் மூச்சுவிட சிரமப்பட்டதாகத் தெரிகிறது. உடனடியாக இருவரையும் கோபி அரசு மருத்துவமனைக்கு கொண்டு வந்தனா். பரிசோதனையில், இருவரும் ஏற்கெனவே உயிரிழந்து விட்டதாக மருத்துவா்கள் கூறினா். இது குறித்து நம்பியூா் போலீஸாா் வழக்குப் பதிவு செய்து விசாரணை நடத்தி வருகின்றனா்.

ADVERTISEMENT
ADVERTISEMENT