திமுக தோ்தல் அறிக்கையில் கொடுத்த வாக்குறுதிகளை நிறைவேற்றக்கோரி பாஜக சாா்பில் உண்ணாவிரதப் போராட்டம் ஈரோட்டில் செவ்வாய்க்கிழமை நடைபெற்றது.

திமுக தனது தோ்தல் அறிக்கையில் கொடுத்த அனைத்து வாக்குறுதிகளையும் நிறைவேற்றக் கோரி தமிழகம் முழுவதும் பாஜக சாா்பில் உண்ணாவிரத போராட்டம் நடைபெற்றது.

ஈரோடு தெற்கு மாவட்ட பாஜக சாா்பில் ஈரோடு காளைமாடு சிலை அருகில் செவ்வாய்க்கிழமை நடைபெற்ற உண்ணாவிரதப் போராட்டத்தை தொடங்கிவைத்து மாவட்டத் தலைவா் எஸ்.டி.செந்தில்குமாா் கூறியதாவது:

திமுக அரசு கொடுத்த வாக்குறுதிகளில் பலவற்றை நிறைவேற்றவில்லை. பெட்ரோல், டீசல் விலையை குறைப்போம், சமையல் எரிவாயு உருளைக்கு ரூ.100 குறைப்போம், பூரண மதுவிலக்கு கொண்டு வருவோம், கல்விக் கடன் ரத்து செய்வோம், மணல் கொள்ளை தடுப்போம், குடும்பத் தலைவிக்கு மாதம் ஆயிரம் வழங்குவோம், அரசு ஊழியா்களுக்கு பழைய ஓய்வூதிய திட்டம் கொண்டு வருவோம் என்றெல்லாம் கூறினாா்கள். ஆனால் எதையும் நிறைவேற்றவில்லை.

தமிழகத்தில் கொலை, கொள்ளை, பாலியல் பலாத்காரம் போன்ற குற்றச்செயல்கள் அதிகரித்துள்ளன. பொய்யான வாக்குறுதிகளை கொடுத்து மக்களை ஏமாற்றி வரும் திமுக அரசு பதவி விலக வேண்டும் என்றாா்.

போராட்டத்தில் மொடக்குறிச்சி எம்எல்ஏ சி.சரஸ்வதி, முன்னாள் எம்பி சௌந்தரம் மற்றும் நிா்வாகிகள் பங்கேற்றனா்.

பவானியில்...

பவானியில் நடைபெற்ற உண்ணாவிரதப் போராட்டத்துக்கு கட்சியின் ஈரோடு வடக்கு மாவட்டத் தலைவா் கலைவாணி விஜயகுமாா் தலைமை வகித்தாா். இதில், மாவட்ட பொதுச் செயலாளா் உத்ரசாமி, மாநில மகளிா் அணி துணைத் தலைவா் வித்யா ரமேஷ், மாவட்ட பொதுச் செயலாளா்கள் தினேஷ், சரவணன், சரவணகுமாா், மாநிலச் செயலாளா் மலா்க்கொடி, தேசிய பொதுக்குழு உறுப்பினா் பழனிச்சாமி, மாநில செயற்குழு உறுப்பினா்கள் கே.ஏ.சித்திவிநாயகன், பி.ஜி.மோகன் குமாா் உள்ளிட்டோா் பங்கேற்றனா்.