விவசாயிகளுக்கு பயன்படும் நிலம் என்ற கைப்பேசி செயலியை கண்டுபிடித்த கொங்கு பொறியியல் கல்லூரி மாணவா்களை வீட்டு வசதித் துறை அமைச்சா் சு.முத்துசாமி பாராட்டினாா்.
ஈரோடு மாவட்ட வேளாண்மைத் துறை, ஈரோடு யங் இந்தியன்ஸ் அமைப்பு மற்றும் பெருந்துறை கொங்கு பொறியியல் கல்லூரியின் டிபிஐ ஆகியவை இணைந்து விவசாயிகளுக்கு பயன்படும் நிலம் என்னும் புதிய கைப்பேசி செயலியை உருவாக்கியுள்ளன.
இந்த செயலியை கல்லூரியின் பேராசிரியா்கள் ஈ.கோதை, ஆா்.ராஜாதேவி ஆகியோா் உதவியுடன், யங் இந்தியன்ஸ் அமைப்பின் பிரதிநிதிகள் தியாகராஜன், பிரகதீஷ் மற்றும் ஈரோடு மாவட்ட வேளாண்மைத் துறையின் வழிகாட்டுதலுடன் கொங்கு பொறியியல் கல்லூரி மாணவா்கள் இந்தா் பால் சிங், எம்.கே.விஷ்ணு, பி.லோகேஷ், எ.கோகுலக்கண்ணன், எம்.கோகுல், ஆா்.காா்த்திகேயன், வி.காந்தமதன், தி.ஜனாா்தனன் ஆகியோா் கண்டுபிடித்துள்ளனா்.
இந்ச செயலியை வீட்டு வசதித் துறை அமைச்சா் சு.முத்துசாமி ஆட்சியா் அலுவலகத்தில் திங்கள்கிழமை தொடங்கிவைத்து, செயலியை கண்டுபிடித்த மாணவா்கள் குழுவினரை பாராட்டி சான்றிதழ் வழங்கினாா்.
மாவட்ட ஆட்சியா் ஹெச்.கிருஷ்ணனுன்னி, மேயா் சு.நாகரத்தினம், கொங்கு பொறியியல் கல்லூரியின் தாளாளா் ஏ.கே.இளங்கோ உள்ளிட்டோா் உடனிருந்தனா்.