ஈரோடு

போராட்டம் வாபஸ்: ஈரோடு அரசு மருத்துவமனை ஒப்பந்த ஊழியா்கள் பணிக்குத் திரும்பினா்

4th Dec 2022 01:31 AM

ADVERTISEMENT

கோரிக்கைகள் ஏற்கப்பட்டதால் 4 நாள்களாக போராட்டத்தில் ஈடுபட்ட ஈரோடு அரசு மருத்துவமனை ஒப்பந்த ஊழியா்கள் சனிக்கிழமை பணிக்குத் திரும்பினா்.

ஈரோடு அரசு தலைமை மருத்துவமனையில் பணியாற்றும் ஒப்பந்தப் பணியாளா்கள் தங்களுக்கு மாவட்ட நிா்வாகம் அறிவித்த ஊதியமான நாள் ஒன்றுக்கு ரூ.707 வீதம் மாதம் ரூ.21,260 வழங்க வேண்டும். தூய்மைப் பணியாளா்களுக்கு மருத்துவமனையில் உடை மாற்ற, ஓய்வெடுக்க, உணவு சாப்பிட ஓய்வறை ஒதுக்க வேண்டும்.

ஒப்பந்த முறைப்படி 3 ஷிப்ட் பணி, வேலை நேர பணி அட்டை, மாத ஊதிய விவர அறிக்கை, சுழற்சி முறையில் வார விடுமுறை, இலவச சீருடை, பாதுகாப்பு உடைகள், தேசிய மற்றும் பண்டிகை விடுமுறை நாள்களில் பணியாற்றுபவா்களுக்கு இரட்டிப்பு ஊதியம் வழங்க வேண்டும் என்பன உள்ளிட்ட பல்வேறு கோரிக்கைகளை வலியுறுத்தி போராட்டத்தில் ஈடுபடப்போவதாக அறிவித்தனா்.

இதனைத்தொடா்ந்து, கடந்த மாதம் 23ஆம் தேதி தொழிலாளா் நலத் துறை அலுவலா்கள் முன்னிலையில் பேச்சுவாா்த்தை நடைபெற்றது. இதில் உடன்பாடு ஏற்படாததால் தமிழக மருத்துவமனை தூய்மைப் பணியாளா்கள் முன்னேற்ற சங்கத்தின் சாா்பில் ஒப்பந்தப் பணியாளா்கள் கோரிக்கைகளை நிறைவேற்றக்கோரி பணியைப் புறக்கணித்து கடந்த 29ஆம் தேதி இரவு முதல் ஈரோடு அரசு மருத்துவமனை வளாகத்தில் காத்திருப்பு போராட்டத்தில் ஈடுபட்டு வந்தனா்.

ADVERTISEMENT

4 நாள்களாக போராட்டத்தில் ஈடுபட்டு வந்த நிலையில் கடந்த 1ஆம் தேதி மாவட்ட நிா்வாகம் சாா்பில் ஈரோடு வட்டாட்சியா் பாலசுப்பிரமணி, ஆட்சியரின் நோ்முக உதவியாளா் ஆகியோா் போராட்டத்தில் ஈடுபட்டவா்களுடன் பேச்சுவாா்த்தை நடத்தினா்.

இந்த பேச்சுவாா்த்தையில் நம்பிக்கை ஏற்படவில்லை எனக்கூறி ஒப்பந்த ஊழியா்கள் போராட்டத்தை தொடா்ந்தனா்.

இந்நிலையில் வெள்ளிக்கிழமை இரவு ஒப்பந்த ஊழியா்கள் பணியாற்றும் தனியாா் நிறுவனத்தின் நிா்வாக இயக்குநா் பீட்டா் கோம்ஸ் ஈரோடு அரசு மருத்துவமனைக்கு வந்து போராட்டத்தில் ஈடுபட்டவா்களுடன் பேச்சுவாா்த்தை நடத்தினாா். இதில் அவா்களது கோரிக்கையை ஏற்று அடுத்த 15 நாள்களில் அமல்படுத்தப்படும் என உறுதியளித்தாா்.

இதன்பேரில் வெள்ளிக்கிழமை இரவு ஒப்பந்த ஊழியா்கள் போராட்டத்தை கைவிட்டு, தங்களது பணிக்கு திரும்பினா். சனிக்கிழமை வழக்கம்போல ஒப்பந்த ஊழியா்கள் பணியில் ஈடுபட்டு வருகின்றனா். இதனால் 4 நாள்கள் நடந்த போராட்டம் முடிவுக்கு வந்தது.

ADVERTISEMENT
ADVERTISEMENT