ஈரோடு மாவட்டத்தில் 2022-23ஆம் நிதி ஆண்டுக்கு ரூ. 15,259.60 கோடி கடன் வழங்க வாய்ப்புள்ளதாக நபாா்டு வங்கித் திட்ட அறிக்கையில் தெரிவிக்கப்பட்டுள்ளது.

நபாா்டு வங்கியின் சாா்பில் வளம் சாா்ந்த கடன் திட்ட அறிக்கை வெளியிடும் நிகழ்ச்சி மாவட்ட ஆட்சியா் அலுவலகத்தில் வியாழக்கிழமை நடைபெற்றது. கடன் திட்ட அறிக்கையை வெளியிட்ட ஆட்சியா் ஹெச்.கிருஷ்ணனுண்ணி கூறியதாவது:

முன்னோடி வங்கியானது ஆா்.பி.ஐ.யின் மாற்றியமைக்கப்பட்ட வழிகாட்டுதலின்படி ஒவ்வொரு ஆண்டும் வளம் சாா்ந்த கடன் திட்ட அறிக்கையை தயாரித்து வெளியிடுகிறது. வங்கி மூலம் அளிக்கும் கடனுதவியானது நாட்டின் பொருளாதார வளா்ச்சி மாற்றத்துக்கு முதுகெலும்பாக உள்ளது.

வளம் சாா்ந்த இந்தத் திட்ட அறிக்கையை விவசாயம், விவசாயம் சாா்ந்த துறைகளுடனும், பல்வேறு தொழில் துறைகளுடனும் கலந்தாலோசித்தும், வங்கிகள் பல்வேறு துறைகளுக்கு வழங்கப்பட்ட கடன் அளவு மற்றும் மாவட்டத்தில் ஏற்கெனவே பல்வேறு துறைகளுக்கு ஏற்படுத்தப்பட்டுள்ள உள்கட்டமைப்பு வசதி, மேலும் தேவைப்படும் வசதி போன்றவற்றை கணக்கில் கொண்டு தயாரிக்கப்படுகிறது. இதன் அடிப்படையில்தான் வங்கிகளுக்கான ஆண்டுக் கடன் திட்ட அறிக்கை தயாா் செய்து வங்கிகளுக்கு கடன் இலக்கு ஒதுக்கப்படுகிறது.

ஈரோடு மாவட்டத்தில் 2022-23ஆம் நிதி ஆண்டுக்கு ரூ. 15259.60 கோடி கடன் வழங்க வாய்ப்புள்ளதாக நபாா்டு வங்கி திட்ட அறிக்கையில் குறிப்பிடப்பட்டுள்ளது. இது சென்ற ஆண்டின் இலக்கான ரூ. 13,750 கோடியைவிட 10.9 சதவீதம் அதிகமாகும். சிறு, குறு தொழில் துறைகள், தோட்டக் கலைப் பயிா்களுக்கு மத்திய கால விவசாயக் கடன்கள், பண்ணை இயந்திரமயமாக்கல், நீா் மேலாண்மை, சேமிப்பு சாதனங்கள், கால்நடை வளா்ப்பு குறிப்பாக பா்கூா் மலைப் பகுதி விவசாயிகள் பயன்பெறும் வகையில் பெரிய பால் குளிரூட்டும் நிலையங்களை அமைத்தல் போன்றவற்றுக்கு அதிக அளவில் கடன் வழங்க வங்கியாளா்கள் உரிய நடவடிக்கை மேற்கொள்ள வேண்டும்.

ஈரோடு மாவட்டம் விவசாயத்தில் முன்னோடி மாவட்டமாக விளங்குவதால் அதற்கு முக்கியத்துவம் அளித்து மொத்த தொகையில் விவசாயத்துக்கு மட்டும் ரூ. 8,113 கோடி, சிறு குறு தொழில்களுக்கு ரூ. 4,449 கோடி ஒதுக்கப்பட்டுள்ளது. விவசாய உள்கட்டமைப்புக்கு ரூ. 606.78 கோடியும், ஏற்றுமதி கடனாக ரூ. 307.50 கோடி, கல்விக் கடனாக ரூ. 438.37 கோடி, வீட்டு வசதி கடனாக ரூ. 976.87 கோடி, புதுப்பிக்கத்தக்க ஆற்றலாக ரூ. 64 கோடி, மகளிா் சுய உதவிக் குழு கடனாக ரூ. 847.87 கோடி வழங்கத் திட்டமிடப்பட்டுள்ளது.

இந்தத் திட்ட அறிக்கையைப் பயன்படுத்தி அனைத்துத் துறைகளும் வளா்ச்சியை எட்ட வேண்டும். விவசாயம், விவசாயம் சாா்ந்த தொழில்களுக்கு தற்போதுள்ள இளைஞா்கள் அதிகமாக ஆா்வமாக உள்ளாா்கள். அவா்களுக்கு உதவும் வகையில் வழிகாட்டுதல் தேவைப்படுகிறது. மேலும் அவா்களுக்கு விழிப்புணா்வு, கடனுதவி வழங்க முன்வர வேண்டும் என்றாா்.

இந்நிகழ்ச்சியில், வேளாண்மை இணை இயக்குநா் எஸ்.சின்னசாமி, மாவட்ட ஆட்சியரின் நோ்முக உதவியாளா் (வேளாண்மை) ஆா்.அசோக், திட்ட இயக்குநா் (மகளிா் திட்டம்) கெட்ஸி லீமா அமாலினி, நபாா்டு வங்கி மாவட்ட வளா்ச்சி மேலாளா் டி.அசோக்குமாா் உள்ளிட்டோா் பங்கேற்றனா்.