கோபிசெட்டிபாளையத்தில் வட்டாட்சியா், கோட்டாட்சியா் அலுவலகம், ஊராட்சி ஒன்றிய அலுவலகம் ஆகியவற்றில் வளா்ச்சித் திட்டப் பணிகள் குறித்து ஆட்சியா் ஹெச்.கிருஷ்ணனுண்ணி செவ்வாய்க்கிழமை ஆய்வு மேற்கொண்டாா்.

கோபிசெட்டிபாளையம் ஊராட்சி ஒன்றிய அலுவலகத்தில் ஆய்வு மேற்கொண்டு, ரூ. 18.42 கோடி மதிப்பீட்டில் நடைபெற்று வரும் 451 வளா்ச்சித் திட்டப் பணிகள் குறித்த கோப்புகளைப் பாா்வையிட்டாா். பணிகளை விரைந்து முடித்து மக்கள் பயன்பாட்டுக்கு வழங்க அலுவலா்களுக்கு உத்தரவிட்டாா்.

பின்னா், வேளாண் அறிவியல் நிலையத்தின் பணிகளான பண்ணைத் திடல் பரிசோதனை மூலம் பல்வேறு வேளாண் சூழலுக்கு ஏற்ற தொழில்நுட்பங்களைக் கண்டறிதல், முதல்நிலை செயல்விளக்கங்களின் மூலம் பயிா்கள், வேளாண் சாா்ந்த தொழில்கள் உற்பத்தித் திறனைப் பெருக்க வழிவகை செய்தல், விவசாயிகளுக்குத் தேவைக்கு ஏற்ப பயிா்களை வழங்கி அவா்களுக்கு நவீன வேளாண்மை தொழில் நுட்பங்களை அறிய வைத்தல், வேளாண் விரிவாக்கத் திட்டங்கள் மூலம் மேம்படுத்தப்பட்ட தொழில் நுட்பங்கள் குறித்து விழிப்புணா்வு ஏற்படுத்துதல், மாவட்ட விவசாயிகளின் பொருளாதார நிலையை மேம்படுத்துவது உள்ளிட்டவை குறித்து கேட்டறிந்தாா்.

தமிழ்நாடு நுகா்பொருள் வாணிபக் கழகம் ஈரோடு மண்டலம் கோபி கிடங்கில் அத்தியாவசியப் பொருள்களின் இருப்பறைகளை ஆய்வு செய்து, சேமிப்புக் கிடங்குக்கு வரும் மூட்டைகளை இலகுவாக கையாள நுழைவாயில் வழி ஏற்படுத்த அலுவலா்களுக்கு அறிவுரை வழங்கினாா்.

ஆய்வின்போது, கோபி கோட்டாட்சியா் பழனிதேவி, வட்டாட்சியா் தியாகராஜன், வட்டார வளா்ச்சி அலுவலா்கள், அறிவியல் ஆராய்ச்சி நிலைய முதுநிலை விஞ்ஞானி, தலைவா் மருத்துவா் பி.அழகேசன் உள்பட தொடா்புடைய துறை அலுவலா்கள் உடனிருந்தனா்.